О́zderińizge málim, tabıǵı ýran óndirý naryǵynda kósh bastaǵan Qazaqstan álemdik suranystyń 40 paıyzyn qamtamasyz etedi. Al sonyń teń jartysy Qazatomónerkásiptiń enshisinde. Bizdiń ónimdi dúnıe júziniń iri energetıkalyq kompanııalary paıdalanady. Ýrandy Reseı, Fransııa, Qytaı jáne Japonııanyń transulttyq kompanııalarymen seriktestikte qurylǵan enshiles jáne birlesken kásiporyndar óndiredi. Qazaqstandaǵy ýran óndirý ádisin MAGATE ekologııalyq eń taza ári qaýipsiz dep tanyǵan. О́kinishke qaraı, bir fýnt ýrannyń baǵasy sońǵy on jylda 136 dollardan 18 dollarǵa deıin tómendep ketti. Ýran óndirisiniń uzaq merzimdi turaqtylyǵyn qamtamasyz etý úshin biz óndiris aýqymyn suranysqa ıkemdep qysqartý jóninde strategııalyq sheshimdi qabyldadyq. Aıta keteıik, 2018 jyldyń qańtar aıynan bastap 3 jylǵa jer qoınaýyn paıdalaný kelisimsharttary boıynsha josparlanǵan óndiris aýqymyn 20 paıyzǵa qysqartý kózdelip otyr. Bul shara kompanııalardyń tutynýshylar aldyndaǵy mindetterine áser etpeıdi.
Sonymen qatar ol seriktestermen qarym-qatynas belsendi júrgizilip jatqanyn tilge tıek etip, qytaılyq «CGNPC» kompanııasymen birge Úlbi metallýrgııa zaýytynyń bazasynda jylý bólgish quramalar shyǵaratyn zaýyt salynyp jatqanyn, onyń qýattylyǵy jylyna 200 tonnany quraıtynyn jetkizdi.
Ǵalymjan Pirmatov Memleket basshysynyń «Qazaqstannyń úshinshi jańǵyrýy: jahandyq básekege qabilettilik» Joldaýyndaǵy tapsyrmalaryn oryndaý maqsatynda avtomattandyrý, sıfrlandyrý jáne robottandyrý boıynsha birqatar jobalar iske asyrylǵanyn da baıandady.
Raýan QAIDAR,
«Egemen Qazaqstan»
