Ǵasyrlar qoınaýynan jetken qobyzdyń qońyr úni, qasıetti dombyranyń kúmis kúmbiri, ult rýhyn qalyptastyrýda orasan mańyzǵa ıe aýyz ádebıeti men halyq ánderi, jalpy ónerdiń uly kóshi qazaqtyń kıeli qazynasy. Búgingi tańda uly ónerdi urpaqqa jalǵap júrgen ónerpazdar da el ıgiligi úshin eńbek etip keledi.
Elbasy maqalasyn halyqqa nasıhattaý maqsatynda «Mýzart» toby Sarysý aýdany, Jańatas qalasyna kelip, aýdan halqymen jáne Qarataý, Sholaqtaý taý-ken kesheniniń, sondaı-aq temirjol kólik salasynyń ujymdarymen kezdesti. Kezdesý kezinde ánshiler «Týǵan elge arnaý», «Jaılaýkól keshteri», «Rahmet saǵan, týǵan el!» atty ánderin naqyshyna keltire oryndap, halyqtyń qoshemetine bólendi. Aýdandyq mádenıet úıine halyq kóptep jınalyp, ónerpazdarǵa qurmet kórsetti. Aýdanǵa «Qarataý» taý-ken óńdeý kesheniniń dırektory, oblystyq máslıhattyń depýtaty Muratqalı Sársenovtiń shaqyrýymen kelgen ónerpazdar jergilikti halyqtyń júrek pernesin terbeıtin ánderin shyrqap, Elbasynyń rýhanı jańǵyrý ıdeıasy men Táýelsizdik týraly oılarymen de bólisti. Qazaqstannyń eńbek sińirgen qaıratkeri Meırambek Bespaev óz sózinde Táýelsizdik uǵymy men Elbasynyń rýhanı jańǵyrý ıdeıasyn egiz uǵym dep esepteıtinin aıtsa, Sáken Maıǵazıev atalǵan keshti Elbasy maqalasynyń aıasynda ótip jatqan keń aýqymdy shara ekenin jetkizdi.
«Mýzart» tobynyń oryndaýyndaǵy Ilııa Jaqanovtyń ataqty «Jaılaýkól keshteri» áni osy Sarysý aýdanynyń Jaılaýkól aýylyna baılanysty týǵan. Bul kúni qasıetti qara dombyranyń kúmbiri men halyq ánderiniń rýhy tyńdarmandy terbep, kópshilikti Jaılaýkól keshindegideı áserde qaldyrdy.
Hamıt ESAMAN,
«Egemen Qazaqstan»
Jambyl oblysy
