Suhbat barysynda Nursultan Nazarbaev "Qazaqstan" telearnasynyń tilshisi Muhtar Túmenbaevtyń "Qazirgi qoǵamda belgili bir qozǵaý bolýy kerek, qoǵamdyq sana ózgerýi kerek. Sizdiń "Bolashaqqa baǵdar: rýhanı jańǵyrý" baǵdarlamańyzda osyǵan jetýdiń birshama joldary kórsetilgen. Sol baǵdarlamy júzege asyrý úshin qurylǵan ulttyq komıssııanyń jumysyna kóńilińiz tola ma?" degen suraǵyna jaýap berdi.
"Biz baǵdarlamany bıyl ǵana jarııaladyq. Iаǵnı, onyń shyqqanyna kóp ýaqyt bolǵan joq. Baǵdarlamany júzege asyrý úshin tıisti zańdar qabyldadyq, usynystar engizdik. Sol boıynsha jumys istep jatyrmyz. Aldyǵa qoıǵan maqsattardyń ishinde eń birinshi orynda latyn árpine kóshemiz degen másele tur. Ony búkil halyq bolyp talqylap, barlyq zııaly qaýymnyń, til ǵalymdarynyń pikirin, eldiń oıyn tyńdadyq. Jan-jaqty qarastyryp, bir sheshimge keldik. Maǵan álipbıdiń eń sońǵy nusqasy tanystyryldy. Men sony bekittim. Biraq latyn álipbıin tolyqtaı engizýge áli ýaqyt bar.
Men qoǵamda túrli pikirlerdiń bar ekenin bilemin. Keıbiri áripterdiń ústindegi útirdiń durys emestigin, keıbiri birneshe qaripten jasaý kerektigin aıtyp jatyr. Túrkitildes aǵaıyndardyń nusqasyna óteıik degen pikir de joq emes. Meniń oıymsha, latyn qarpi kompıýterlik nusqaǵa saı bolýy kerek. Kompıýtermen jumys isteýge qıyndyq týdyrmaıtyndaı jaǵdaı jasaý kerek. Sondyqtan men qazirgi nusqany durys dep sanaımyn", - dedi Prezıdent Nursultan Nazarbaev.
