Kelissóz barysynda kún tártibindegi ekijaqty ekonomıka máseleleri, sıfrlyq tehnologııalardy paıdalaný kezindegi birlesken jumystardyń perspektıvalary, sondaı-aq sý jáne energetıka salasyndaǵy yntymaqtastyq máseleleri qarastyryldy.
Qazaqstan Prezıdenti eki el úkimetteri qol qoıǵan Jol kartasynyń oryndalý nátıjelerine kóńili tolatynyn aıtyp, bul jumystardy jalǵastyrýdyń mańyzdylyǵyn atap ótti.
– Jol kartasy naqty ýaqyt pen kúsh-jigerdi talap etetin sharalardy qamtıdy. Osyǵan baılanysty, elderimizdiń úkimetterine osy mańyzdy qujattyń ár tarmaǵynyń sapaly ári dáıekti túrde iske asyrylýyn qamtamasyz etý tapsyryldy, – dedi Memleket basshysy.
Nursultan Nazarbaev ekijaqty saýda-sattyqty keńeıtý máselelerine erekshe toqtalyp, 2020 jylǵa qaraı ózara taýar aınalymyn 1 mıllıard dollarǵa deıin arttyrý qajet ekenin aıtty.
Sonymen qatar, Memleket basshysy Qazaqstan qyrǵyz ekonomıkasynyń basty ınvestorlarynyń biri ekenin aıtyp, ınvestısııa úshin qolaıly jaǵdaı jasaýdyń mańyzdylyǵyn atap ótti.
– Biz ınvestısııalyq yntymaqtastyqty jaqsartý jáne saýda-ekonomıkalyq qarym-qatynasty jandandyrý maqsatymen Qazaqstan men Qyrǵyzstannyń Iskerlik keńesin qurý múmkindigin talqyladyq. Ol elderimizdiń sharýashylyq sýbektileri arasyndaǵy tikeleı baılanystardy nyǵaıtýǵa septigin tıgizedi, – dedi Qazaqstan Prezıdenti.
Taraptar sý-energetıkalyq yntymaqtastyq taqyrybyna da nazar aýdardy. Atap aıtqanda, transshekaralyq ózenderdegi sý resýrstary óńirdegi barlyq elder úshin ortaq bolyp sanalatynyn taǵy da maquldady.
Budan bólek, Nursultan Nazarbaev óńirlik qaýipsizdikti qamtamasyz etý jáne halyqaralyq uıymdar aıasynda ózara is-qımyl jasaýdyń mańyzdylyǵyn atap ótti.
Sooronbaı Jeenbekov Nursultan Nazarbaevqa alǵys bildirip, Qyrǵyz Respýblıkasyna resmı saparmen kelýge shaqyryp, Qazaqstan men Qyrǵyzstannyń joǵarǵy memleketaralyq keńesiniń kezekti otyrysyn ótkizý josparlanatynyn aıtty.
– Qazaqstan Qyrǵyzstannyń negizgi saýda seriktesteriniń biri bolyp sanalady. Osyǵan oraı, biz ekijaqty ekonomıkalyq yntymaqtastyq, sondaı-aq shekara, kólik, fıtosanıtarııa, veterınarlyq baqylaý, keden jáne salyq ákimshiligi salasyndaǵy ózara is-qımyl máseleleri jónindegi jol kartasynyń iske asyrylýyna zor mán beremiz, – dedi Qyrǵyzstan Prezıdenti.
Sonymen birge, Sooronbaı Jeenbekov Qazaqstannyń BUU Qaýipsizdik Keńesiniń turaqty emes múshesi bolyp saılanýymen quttyqtap, bul mańyzdy halyqaralyq organǵa aldaǵy ýaqytta tóraǵalyq etýimizge oraı tabys tiledi.
Sapar aıasynda ekijaqty kóptarapty yntymaqtastyqty jańa sapaly deńgeıge kóterýge jáne memlekettik shekaranyń halyqaralyq-quqyqtyq resimdelýin aıaqtaýǵa baǵyttalǵan birqatar ekijaqty qujattarǵa qol qoıyldy:
– Qazaqstan Respýblıkasy Prezıdenti men Qyrǵyz Respýblıkasy Prezıdentiniń birlesken málimdemesi;
– memlekettik shekarany belgileý týraly shart;
– memlekettik shekara rejimi týraly kelisim.
Jýrnalıster aldynda sóz sóılegen taraptar ótken kelissózderdiń qorytyndylaryna qanaǵattanatynyn aıtyp, bul sapar elderimiz arasyndaǵy jan-jaqty ózara is-qımyl úshin jańa jol ashatynyna senim bildirdi.
