Jıyn barysynda Elbasy Almatyda ótken 2017 jylǵy Dúnıejúzilik qysqy ýnıversıada men «EKSPO-2017» kórmesi kezinde aýqymdy sharalarǵa jumsalǵan shyǵyndar týraly jáne salǵan ınvestısııanyń qanshalyqty aqtalǵandyǵy týraly qoıylǵan jýrnalıstiń saýalyna jaýap berdi.
«О́zderińiz bilesizder halyqaralyq kórmeniń ótýine 115 memleket at salysty. Kelgen qonaqtardyń sany biz kútkennen eki esege asyp tústi. Barlyq qonaq úıler toldy, shaǵyn jáne orta bıznes jandana tústi. Meniń oıymsha tutas bir tamasha jańa aýdan turǵyzdyq. Munyń barlyǵy el turǵyndary úshin qyzmet ete beretin bolady. «Nur-Álem» sferasy mýzeı retinde qala beredi. Al búginde qalashyqqa kúnine 600 adam, senbi-jeksenbi kúnderi 1200-ge jýyq adam keledi. Alyp muz aıdynynda qys boıy syrǵanaýǵa bolady», degen Prezıdent N.Nazarbaev kórmeden keıinge qalashyqtyń odan ári qarqyndy jumys isteı beretindigin atady.
«Munda halyqaralyq qarjy ortalyǵy qurylady. Qazaqstandyqtar ázirge bırjamen, aksııamen jumys isteýdi bilmeıdi. Amerıkalyqtardyń 70 paıyzy aksııanyń arqasynda qosymsha tabys taýyp otyr. Qazaqstandyqtardy aksııaǵa aqsha salýdy, osy arqyly baıýdy úıretemiz. Sonymen birge jasyl tehnologııalar ortalyǵy, start-ap óndirisi ortalyǵy men IT kompanııalar kelesi jyldan bastap jumys isteıtin bolady», dedi Elbasy.
