«Árıne, biz bankterdi qarjylandyrý maqsatynda Ulttyq qordan birshama qarajat bóldik. О́ıtkeni, bankter – el ekonomıkasynyń kúretamyry. Eger qıyn jaǵdaıda olarǵa kómektesip, qol ushyn sozyp, qutqaryp qalmasaq tutas ekonomıkamyz keri ketýi múmkin», degen Memleket basshysy qarjylyq naryqty tyǵyryqtan shyǵarý áreketimiz eldiń áleýmettik turmystyq máseleleriniń túzelýine qalaı áser etetindigin túsindirdi.
«О́zderińiz bilesizder muǵalimderdiń jalaqysyn 30 paıyzǵa deıin kóterdik. Qazirgideı jaǵdaıda ustazdarynyń áleýmettik jaǵdaıynyń túzelýi úshin osynshalyqty kóńil bólip otyrǵan elder sany az. Al endi bankterdi qarjylandyrý men áleýmettik sala qyzmetkerleriniń jalaqysyn baılanystyra otyryp, máseleni qarapaıym tilmen túsindirip kóreıin. Biz eki-úsh jyl buryn medısınalyq qyzmet salasyn sátti reformalaı aldyq. Qazir bul baǵyttaǵy jumystar zamanaýı talappen úılesip, álemdik tájirıbege saı qyzmet kórsetýde. Endigi jerde bilim salasyn da osylaı reformalaý qajet. Máselen, jańa tehnologııany jetik meńgergen, bilim berýdiń zamanaýı úlgisin ozyq ıgergen muǵalimniń jalaqysyna 30 paıyz kóleminde ústemaqy tólene bastady. Sol sııaqty joǵary oqý oryndarynda da osyndaı júıe qoldanysqa enýde. Aıtalyq, joǵary sanatty ustazdyń sońynan júrgen stýdentterdiń kóptiginen onyń bilim-biligi baǵalanady. Olarǵa 50 paıyzǵa deıin ústemaqy tólenýde. Mine, bul júıe naryqtyq ekonomıkanyń zańdylyǵy. Áleýmettik salanyń turalap qalmaýy úshin qarjylyq ınstıtýttarǵa Ulttyq qor arqyly qoldaý kórsetýdemiz. Ol qarjy keleshekte qaıtarylatyn bolady», dedi Prezıdent.
