«Qazir álemde ne bolyp jatqanyn kórip otyrsyzdar. Bul týraly moldalarmen kezdeskende de aıtqanmyn. Jaqynda jańadan múftı saılandy. Biz qazaqstandyqtar – zııaly elmiz. Dinniń máselesi memleketten bólek turady. Degenmen ony basqarmaı, qadaǵalamaı bolmaıdy. Sondyqtan arnaıy mınıstrlik quryldy», dedi Elbasy.
Memleket basshysy dindi jeleý etip elge búlik salǵysy kelgenderdi qatań qadaǵalaý kerek ekenin aıtyp, dinniń jumysy memlekettiń qolynda bolýy kerek ekenin atap ótti.
«Qara kıim kıip, tumshalanǵan qazaq tarıhynda eshýaqytta bolǵan joq. Áıelderdiń betin jaýyp, olardy ekinshi sortty adamdar degen el emespiz. Ony da qaraýymyz kerek. Saqaldary beline túsip, shortpenen júrgen ol da bizge jaramaıdy. Dinde ata-babamyzdan qalǵan ózimizdiń jolymyz bar. Sol jolmenen júrýimiz kerek. Barlyq memleketterde dinniń jumysy memlekettiń qolynda. Naǵyz musylmanbyz degen arab elderiniń barlyǵynda solaı. Sondyqtan biz de qadaǵalap otyrýymyz kerek. Qaı dinge baramyn dese eshkimge shektelý joq. Degenmen elge búlik salmaýy kerek. Basqa aǵymǵa dindi buryp áketip terrorıstter ishimizden shyqpaýy kerek», dedi N.Nazarbaev.
