Sessııa aıasynda materıaldyq emes qundylyqtarǵa arnalǵan kórme usynyldy, sondaı-aq asyq oıyny kórsetildi. Asyq oıyny adamnyń oı órisi men dene bitiminiń damýyna yqpal etedi ári ultyna qaramastan, óskeleń urpaq arasynda ózara jaqyndasýǵa jol ashady. Balalyq shaq sımvoly retinde asyq oıyny Qazaqstan halqynyń birligin nyǵaıtýda, sondaı-aq birlik pen ulttyq sana-sezimin damytýda mańyzdy ról atqarady. Halyqaralyq sarapshylar atap ótkendeı, jas balalar bul murany saqtap qalýdyń negizgi býyny bolyp tabylady.
Nomınasııany daıyndaý jumysyn Qazaqstannyń IýNESKO jáne ISESKO isteri jónindegi hatshylyǵy, Materıaldyq emes mádenı murany qorǵaý jónindegi ulttyq komıtettiń sarapshylary, elimizdiń IýNESKO janyndaǵy Turaqty ókildigi jáne Mádenıet jáne sport mınıstrligi birlese atqardy.
Materıaldyq emes mádenı murany qorǵaý konvensııasyn Qazaqstan 2011 jyly jeltoqsanda ratıfıkasııalaǵannan beri materıaldyq emes mádenı muranyń reprezentatıvti tizimine Qazaqstannan 7 nomınasııa engizildi: «Dombyramen kúı oryndaý óneri» (2014 j.), «Qazaq kúresi» (2016 j.), Qyrǵyzstanmen birlesken nomınasııalar retinde «Kıiz úı jasaý mashyqtary» (2014 j.) jáne «Aıtys/Aıtysh, sýyryp- salma óneri» (2015 j.), sondaı-aq kópulttyq ótinimder retinde «Naýryz» (12 el), «Qus salý» (18 el) jáne «Túrik pátir nany» (5 el). Sońǵy úsheýi 2016 jyly engizildi.
IýNESKO-nyń halyqaralyq tizimine qazaq ótinimderin engizý elimizdiń materıaldyq emes mádenı murasyn halyqaralyq dárejede tanytýǵa jáne ony qorǵaý úshin júıeli is-sharalardy júzege asyrýǵa oń septigin tıgizedi.
Aldaǵy jyldary Qazaqstan IýNESKO-nyń materıaldyq emes mádenı muranyń reprezentatıvti tizimine «qazaq jylqyshylarynyń dástúrli kóktemgi salty» jáne «Qorqyt-Ata murasy» atty (Túrkııa, Ázerbaıjan, Qyrǵyzstanmen birlesken) kópultty ótinimderdi engizýdi josparlap otyr.
«Egemen-aqparat»
