Energetıka mınıstriniń aıtýynsha, qazaqstandyq tutynýshylar elektr jáne jylý qýatymen tolyq kólemde qamtamasyz etilgen. Ortalyq jáne jergilikti atqarýshy organdar 05.09.2017 kúni ótken Úkimet otyrysy barysynda anyqtalǵan kemshilikterdi joıý boıynsha tıisti jumystardy júrgizdi.
«Elektr stansalarynda bıylǵy jylǵa josparlanǵan jóndeý jumystary aıaqtaldy. 8 energetıkalyq blok, 57 qazandyq, 35 týrbına, sondaı-aq 24 myń shaqyrym elektr jelisi jóndeldi», — dedi Qanat Bozymbaev.
Jalpy alǵanda, otandyq elektr stansalarynyń otyn qoımalarynda 4,3 mln tonnadan astam kómir jáne 111 myń tonna mazýt jınalǵan, bul bekitilgen normalarǵa sáıkes keledi. Ortalyq jylýmen qamtý aýmaqtarynyń qazandyqtarynda kómir qory 792,4 myń tonnany (normatıv – 442,7 myń tonna), mazýt – 108 myń tonnany (normatıv – 83,6 myń tonna) quraıdy.
«2017-2018 jj. kúzgi-qysqy kezeń bastalǵannan beri Biryńǵaı elektr energetıkalyq júıe eleýli tehnologııalyq buzýshylyqtarsyz jumys istep tur», — dedi Qanat Bozymbaev.
О́z kezeginde ınvestısııalar jáne damý mınıstri Jeńis Qasymbek kómir tasymaldaý jaǵdaıy týraly málimdedi. Búgingi tańda Qazaqstanda kómir tasymaldaýǵa arnalǵan ashyq vagon parki 50 myńnan astam birlikti quraıdy. Jylytý maýsymyna daıyndyq bastalǵannan beri 43,5 mln tonnadan astam kómir tasymaldandy, bul jospardyń 98 paıyzyn quraıdy.
«Tasymaldaýdy tolyq qamtamasyz etý úshin júk jóneltýshiler, júk alýshylar men tasymaldaýshy arasynda ishki respýblıkalyq tasymalda júk jóneltý boıynsha tikeleı uzaq merzimdi kelisimsharttar jasaldy. Jazǵy ýaqytta kómir tasymaldaý kóleminiń teń bólinýi qamtamasyz etildi», — dedi Jeńis Qasymbek.
Jylytý maýsymy óńirlerde de shtattyq rejımde júrip jatyr. Qazirgi jaǵdaı týraly oblys ákimderi men Almaty, Astana qalalarynyń ákimderi baıandady.
Premer-Mınıstr Baqytjan Saǵyntaev máseleni qaraý qorytyndysy boıynsha tıisti mınıstrlikter men jergilikti atqarýshy organdarǵa jylý berý maýsymynyń ótý barysyn turaqty baqylaýda ustaýdy tapsyrdy.
