Jyr keshine aqynnyń ónerdegi zamandastary men qalamdas inileri, jergilikti jazýshylar, jalpy jyr súıer halyq qatysyp, rýhanı sóz ónerimen sýsyndatty.
Ádebıet súıer qaýymǵa etene tanys aqyn, Memlekettik syılyqtyń laýreaty Iranbek Orazbaev, fılologııa ǵylymdarynyń kandıdaty Eýrazııa ýnıversıetiniń dosenti Ońaıgúl Turjan, T.Aıbergenov atyndaǵy syılyqtyń laýreaty, Qazaqstan Respýblıkasy Jastar odaǵy syılyǵynyń jáne Halyqaralyq «Alash» ádebı syılyǵynyń laýreaty Gúlnár Salyqbaeva, fılologııa ǵylymdarynyń doktory, L.N.Gýmılev atyndaǵy Eýrazııa ulttyq ýnıversıtetiniń professory Janat Aımuhambet, dástúrli ánshi Gúlmıra Sarına, Qazaqstannyń eńbek sińirgen qaıratkeri, "Daryn" memlekettik jastar syılyǵynyń ıegeri Aıgúl Qosanova, atyraýlyq aqyndar Baqytgúl Babash pen Álııa Dáýletbaeva, sondaı-aq Atyraý oblystyq ákimdiginiń delegasııasy shyǵarmashylyq keshke arnaıy keldi.
Rýhanı keshti aqyn Janat Aımuhambet pen aqyn-jýrnalıst Erbol Alshynbaı júrgizdi.
Sharada sóz alǵan oblys ákimi Eraly Toǵjanov: «Sózdiń kıesi qurmettelgen mereıli de mártebeli, rýhanı keshke kýá bolyp otyrmyz. Qazaq úshin sóz – kıe, jyr – namys, óleń – ómirdiń máni. Svetqalı Nurjan poezııasyna boılaǵan saıyn «Rýhanı jańǵyrý» úderisin júzege asyrýda taptyrmas qural baryna kóziń jete túsedi. Svetqalı óz jyrlarynda ultty birlikke jeteleıdi. Osy baǵdarlama aıasynda, aqyn shyǵarmalarynyń tolyq jınaǵyn shyǵarýdy qolǵa alǵanymyz durys. Kelesi jyly, Astanamyzdyń 20 jyldyǵy aıasynda aqynnyń keshin Elordanyń tórinde ótkizgenimiz jón. Svetqalı shyǵarmashylyǵyn nasıhattaýdaǵy sharanyń biri – «Han kegi» dastanynyń sahnalanýy bolmaq. Bul baǵyttaǵy ázirlik jumystary bastalyp ketti, buıyrsa, 2018 jyldyń aqpan aıynyń basynda spektakldiń premerasy ótpek. Ádebıet áleminde ózindik qoltańbasy bar qalamger, qoǵamda eldik ıdeıasy bar aqyn!»,-dedi.
Ulttyq rýhty tanytyp, túp-tamyrymyzdy jyrlaǵan qalamgerdiń keshi araǵa jıyrma jyl salyp ótip otyr. Saǵyndyryp ótkizgen keshinde aqyn sahnaǵa shyǵyp óz týyndylaryn oqydy.
Keshke jıylǵan qaýym qoshemet kórsetip, jyr keshi ıesine degen qurmetpen tarasty.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
