Elbasymyz Nursultan Nazarbaev atap ótkendeı «qos memleket arasynda burynnan tarıhı jáne mádenı baılanystarǵa negizdelgen dástúrli dostyq sıpatyndaǵy ekijaqty qarym-qatynas qalyptasqan». Jyl ótken saıyn saıası, saýda-ekonomıkalyq jáne mádenı-gýmanıtarlyq baılanystyń damýy da artyp keledi. Qazaqstan men Ázirbaıjan arasynda búginge deıin júzdegen qujatqa qol qoıylyp, ekonomıkalyq yntymaqtastyq jónindegi ortaq parlamentaralyq kommısııasy tabysty jumys atqarýda.
Qos memleket arasyndaǵy yntymaqtastyqtyń mańyzdy aspektileriniń biri - tranzıttik áleýet. Máselen, Ázirbaıjan arqyly ótetin Kavkazdyq baǵyt Qazaqstanǵa Eýropalyq naryqqa shyǵýǵa múmkindik beredi. Al Qazaqstan Ázerbaıjanǵa Ortalyq Azııa men Qytaı naryǵyna shyǵýǵa jol ashady.
10 jyl boıy Bakýde jylyna 350 myń tonnaǵa deıin aýystyryp tıeý qýaty bar jáne bir mezgilde 15 myń tonna astyq saqtaı alatyn syıymdylyǵy bar «Baký astyq termınaly» JShQ birlesken kásiporny jumys jasap keledi. Ázirbaıjandy joǵary sapaly astyqpen qamtamasyz etýmen qatar, kásiporynda Qazaqstandyq astyqty Kavkaz jáne Qara teńiz óńirleriniń memleketterine, EO elderine eksporttaıdy.
Indýstrııalandyrý kartasy aıasynda Ázerbaıjan kompanııasy – «Azersýn О́ndiris jáne Logıstıka Ortalyǵy» JShS-niń «Aqtaý teńiz porty» AEA-da azyq-túlik taýarlaryn saqtaý úshin aýdany 178,7 myń sharshy metr bolatyn qoımalyq orynjaılar qurý jobasy iske asty. Jobanyń jalpy quny 1,4 mlrd.teńgeni quraıdy.
Qazaqstan Ázirbaıjanǵa temirjol jáne tramvaı lokomotıviniń jabdyqtaryn, qara metall, janar-jaǵarmaı, qurylys materıaldaryn eksporttaıdy. Importtyń negizgi bóligin qant jáne kondıterlik ónimder, qara metaldan jasalǵan ónimder, kókónis pen dánder, tekstıl ónimderi men elektr qural-jabdyqtary quraıdy.
Eki el úshin de mańyzdy joba - Quryq porty. Kıeli Mańǵystaý jerinen artylǵan júk Ázirbaıjan arqyly Kavkaz, Túrkııa jáne Eýropa elderine jol tartady. Aldaǵy ýaqytta da dál osy Quryq porty arqyly baılanys arta túspek.
Mańǵystaý oblysy men Ázirbaıjan Respýblıkasy arasyndaǵy ishki saýda aınalymy 2017 jyldyń qańtar-qazan aılary boıynsha 41,2 mln. AQSh dollaryn qurady. Onyń ishinde 26,1 mln. AQSh dollary eksport úlesine, 15,1 mln. AQSh dollary ımportqa tıesili. Búginde aımaqtaǵy 52 mekemede Ázirbaıjandyq kompanııalardyń úlesi bar.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
