Komanda kapıtany Artýr Ardavıchýstyń sózine sensek elordalyq top «Dakarǵa» tyńǵylyqty daıyn. Bıyl eń qaýipti rallı marafonynda komanda óz ekıpajyn eki sanat boıynsha jarys jolyna shyǵarmaq. Naqtyraq aıtsaq, júk kólikteri sanatynda komanda namysyn dástúrli túrde Artýr Ardavıchýstyń jetekshiligimen shtýrman Serj Brıýnkens pen mehanık Maıkl Hıýsman qorǵaıtyn bolady. Olar jarys jolyna kóktem aılarynda «Jibek joly» rallıinde synaqtan sátti ótken IVECO júk kóligimen shyqpaq. Atalǵan topqa «508» degen nómir berilgen.
Al kvadrosıklshiler Dmıtrıı Shılov pen Maksım Antımırov «Astana» atynan «Dakar-2018» rallıine tuńǵysh ret qatysqaly otyr. Kvadrosıklshiler ekıpajynyń enshisine «265» jáne «266» nómirleri buıyrǵan. Jyl boıy «Dakarǵa» qatysatyn kvadrosıklshiler quramy jasaqtalyp, 12 úmitkerdiń ishinen eki úzdik azamat iriktelip shyqqan. Elordalyq komanda ókilderi jańa sportshylarymyz oıdaǵydaı óner kórsetip, Kardobaǵa Qazaqstannyń baıraǵymen jetedi degen senimde.
– «Dakar» shyn máninde álemdegi eń qaýipti ári qyr-syry kóp jarys. Bizdiń komanda bul marafonǵa árqashan jaýapkershilikpen ári muqııat daıyndalady. Sońǵy aıdy bizdiń komanda Ile Alataýy taýlarynda ótkizdi – bolıvııalyq jarys jolyna daıyndaldyq, munda kezeńder 3000 metrden bıikte ótedi. «Dakar» qatysýshylardan júz paıyz daıyndyqty talap etedi – barlyǵyna da tehnıkalyq turǵydan da, fızıkalyq jaǵynan da daıyn bolýyń kerek. «Astananyń» qazir saqadaı-saı ekenin aıta alamyn – barlyq anyqtama men qujattar qolymyzda. Endigi kezekte jarys jolyn asyǵa kútip otyrmyz, – deıdi «Astana» komandasynyń bas menedjeri ári kapıtany Artýr Ardavıchýs. Áıgili marafonǵa qatysýǵa bıyl ár túrli sanat boıynsha álemniń ár qıyrynan 500-den asa sportshy tirkelgen. Marafonnyń jalpy qashyqtyǵy toǵyz myń shaqyrym.
Eske salsaq, «Astana» rallı 2011 jyldan bastap «Dakar» halyqaralyq jyl saıynǵy transqurlyqtyq rallı-marafonyna qatysyp júrgen alǵashqy ári ázirge jalǵyz qazaqstandyq komanda. Komanda osyǵan deıin «Júk kólikteri T2» kategorııasyndaǵy rallı reıdter boıynsha álemniń eki dúrkin chempıony jáne «Dakardyń» eki márte qola medal ıegeri atanǵan. Oǵan qosa 2012 jyly júk kólikteri sanatynda, sondaı-aq, «Júk kólikteri T2»kategorııasynda «Silk Way Rally-2016» halyqaralyq iri transqurlyqtyq rallı dodasynyń jeńimpazdary. «Sportshylardyń jyl boıy jarysqa daıyndyq ústinde tynymsyz tókken terin eskersek, komandamyz aldaǵy básekede alǵa qoıylǵan maqsattardy oryndaıtynyna kúmánim joq», deıdi «Astana» Prezıdenttik klýbynyń atqarýshy dırektory Amanbek Kýlchıkov. Endeshe álemniń eń azýly komandalary bas qosatyn básekede el namysyn arqalaıtyn azamattarǵa senim bildirip, jeńisti joldyń jalǵana berýin tileıik.
Arman OKTIаBR,
«Egemen Qazaqstan»
ALMATY
