Memleket basshysynyń marapaty munaı-gaz salasyndaǵy barlyq qyzmetkerlerge degen qurmeti dep bilemin.
Táýelsizdiktiń alǵashqy jyldarynda irgesi qalanǵan «Teńizshevroıl» JShS búginge deıin biraz jetistikterge jetti. Munaı óndirý jylyna 27,5 mln tonnaǵa deıin ósti. Kompanııa qazaqstandyq qamtý máselesine aıryqsha kóńil bólip keledi. TShO 1993 jyldan beri otandyq kompanııalardyń 22,9 mlrd AQSh dollaryna teń taýarlary men qyzmetterin paıdalandy. Qazir iri kásiporynda 20 myńnan astam qazaqstandyq maman jumys isteıdi. Alǵashqy jyldary mamandardyń kópshiligi sheteldikter boldy, tipti qarapaıym jumysshylar da muhıt asyp qazaq jerine nápaqa izdep kelgen edi. Qazir qatardaǵy qyzmetkerler ǵana emes, basshylyq laýazymdaǵy azamattar da otandyq mamandarmen almastyryldy. Bul iste memleket tarapynan qadaǵalaý men qoldaý bolǵany bizdiń jigerimizdi janydy. Qazaq jigitteri men qyzdarynyń da munaı-gaz salasyn ıgerýge degen yntasy oıandy. Qazir kompanııadaǵy basshylyq qyzmettegi azamattardyń 70 paıyzy qazaqstandyqtar. Endi bir bes jylda bul kórsetkish tipti kóbeıeri anyq. Men elimizdiń munaıdy óndirip qana qoımaı, óńdeýshi retinde de naryqqa shyqqanyn armandaımyn. Jastar osy maqsatta bilim alsa, eńbek etse, alynbaıtyn qamal joq.
Mine, taǵy bir jyl esigimizden engeli tur. 2017 jyl elimiz úshin jaqsy jańalyqtarǵa, jasampaz jetistikterge toly boldy. Elbasy qolynan joǵary marapat alýym da ǵumyryma sáýleli sát syılady. Keler jyldan úmit kóp. Bastysy, elimiz tynysh, Elbasymyz aman bolsyn. Jańa jyldan da jaqsylyqtar kútemiz.
Rýslan QÝATOV,
«Qazaqstannyń Eńbek Eri»,
«Teńizshevroıl» JShS menedjeri
