Mysaly, Qadyrjan Maqanǵalıdyń ózi jas ǵalym. Ol taıaý ýaqytta oblys ortalyǵynan shalǵaıda jatqan Qamysty aýdanynda halyqaralyq dárejede atalyp ótken ınnovasııalyq tehnologııamen óńdeletin shujyq sehyn ashýdy josparlap otyr. Al Dmıtrıı Romashenko memlekettik tildi taza meńgerip alýymen qatar, Fedorov aýdanyndaǵy №1 orta mektepte qazaq tilinen ozyq ádistememen sabaq beredi. Bıyl «Altyn kitapqa» esimderi jazylǵan 11 jastyń – toǵyzqumalaqshy Qymbat Nóserovanyń, akter Tólendi Álqojınniń, muǵalim Ámirjan Jumabekovtiń, jýrnalıst Dılara Aronovanyń, kásipker Mıras Adambaevtyń, jastar kóshbasshylary Serik Manasbaevtyń, Bákir Marǵulannyń, dárigerler Aleksandr Kolesnıchenko men Elvıra Asadovanyń árqaısysy óziniń osyndaı úzdik isimen, darynymen qyzyqty dastan sekildi.
– Bala jasymnan memlekettik tilge qyzyǵýshylyǵym bolatyn. Biraq A.Baıtursynov atyndaǵy Qostanaı memlekettik ýnıversıtetiniń qazaq fılologııasy mamandyǵyna túskenimde tilim qazaqshaǵa onsha kelmeıtin jáne kóp sózderdi túsinbeıtinmin. Qınalǵan kúnderdiń bári artta qaldy, tórtinshi kýrsta erkin sóılep kettim. Mende memlekettik tildi bilýim kerek degen maqsat boldy. Qazaq tili men úshin ashylǵan tereń teńiz sekildi. Al aýylda memlekettik tilde sabaq berýdi ómirlik maqsatym dep bildim, – deıdi Dıma aǵynan jarylyp.
Qazir onyń qazaq tilin meńgerý jáne úıretý jónindegi izdenisteri til mamandarynyń nazaryn aýdaryp júr.
Jylda dástúrli túrde ótetin «Qostanaı oblysy jastarynyń altyn kitaby» bal-keshine bıyl da oblys ákimi Arhımed Muhambetov qatysty.
– Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty maqalasyndaǵy aıtylǵan máselelerdiń barlyǵy da jastarǵa arnalady, sondyqtan ony júzege asyratyn da sizder bolasyzdar. Eńbeksiz, maqsatsyz eshkim de memleketke, otbasyna paıdaly is isteı almaıdy. Bizdiń bul shara jyl saıyn el bolashaǵynyń kókjıegindeı arman qýǵan talantty, daryndy jastardyń ósip kele jatqanyna kepil bolady. Búgingi marapat, qurmet sizderdiń eńbekterińizdi moıyndaý ǵana emes, qoǵamnyń sizderge kórsetken úlken senimi. О́zge jastar sizderge teńelgisi keledi, – dedi oblys basshysy.
Qostanaıda 12 jyldyń ishinde 184 jastyń esimi «Qostanaı oblysy jastarynyń altyn kitabyna» altyn árippen jazyldy. Olardyń arasynda búgingi Parlament Májilisiniń depýtaty Álııa Saparova, ǵalym Indıra Beıisheva, eki dúrkin Olımpıada júldegeri, búginde kásipqoı boksta júrgen Ivan Dychko, konkımen syrǵanaýdan Álem chempıony, aty «Qazaqstannyń 100 jańa esimi» tizimine kirgen Denıs Kýzın, arbada otyryp bıleýden álem chempıonatynyń 2 ret qola júldegeri Málıke Muhtarova, Qazaqstan fýtbolynyń chempıony, ulttyq qurama kapıtany Nurbol Jumasqalıev, taǵy basqalar bar.
Qostanaı oblysynda memlekettik jastar saıasatyn qarjylyq qoldaý da jyl saıyn ósip keledi. Bıyl bıýdjetten osy maqsatqa 190 mıllıon teńge bólindi.
Názıra JÁRIMBET,
«Egemen Qazaqstan»
QOSTANAI
