Qos aqqýdyń Aqsýat mańyndaǵy shaǵyn ózenderdiń birine qonǵany jónindegi aqpar pen vıdeony eń áýeli aıtysker aqyn Ońǵar Qabdenovtiń feısbýk áleýmettik jelisindegi paraqshasynan oqyp, kórip, ózine habarlasqanbyz. Sóıtsek bul vıdeony túsirgen Aqsýat aýylynyń Jambyl kóshesiniń turǵyny Ulpan Arǵyntaıqyzy eken. Ony bizge aýdandyq «Tarbaǵataı» gazetiniń tilshisi Dınara Qabdilashymqyzy aıtty. Birden Ulpannyń ózine telefon shaldyq. «Qos aqqýdyń úıimizdiń janyndaǵy aryqqa qonǵanyn eń birinshi meniń baýyrym kóripti. Maǵan kelip «vıdeoǵa túsiremin» dep telefonymdy surady. «Ne úshin?» dep em, «baqshanyń janyndaǵy sýda aqqý júr» dedi. Baýyrymmen birge barsam rasynda da eki aqqý júzip júr eken. Baryp nan bermekshi bolyp ek, úrkip ári qaraı ushyp, mańyna jýytpady. Erteńinde jumystan túski asqa kelsem, ushyp ketipti», - deıdi Ulpan.
Qus tóresiniń qańtardaǵy kelisin aýdan jurtshylyǵynyń birqatary jaqsylyqqa balap jatsa, endi biri «kólge qonatyn aqqýdyń shaǵyn ózende júrgeni nesi?» dep túsinbeı álek. Tarbaǵataı aýdanyndaǵy ekologııa jáne tabıǵatty qorǵaý qorynyń tóraǵasy Erjan Quttybaev qos aqqýdyń biri aýyryp qonýy múmkin ekendigin aıtady.
Aıtpaqshy, búgin Ońǵar Qabdenov feısbýktegi paraqshasynda Aqsýat mańyna kúnniń jyly kezinde júretin dýadaqtyń da kelgenin jazypty. Ǵalamdyq jylyný bizge de jetti me eken?!
Azamat QASYM,
«Egemen Qazaqstan»
Shyǵys Qazaqstan oblysy,
Tarbaǵataı aýdany,
Aqsýat aýyly
Vıdeo men sýretti túsirgen Ulpan ARǴYNTAIQYZY
