Atalǵan joǵary oqý ornynyń ǵalymdary fızıka kabınetine arnalǵan zerthanalyq qural-jabdyqtardy ázirleýge bel býypty. Bul tikeleı óndirispen aınalyspaıtyn bilim ordasy túgil, arnaıy mamandandyrylǵan mekeme-kásiporyndar da «qalpaqpen soǵyp» ala almaıtyn kúrdeli ári kúrmeýi qıyn másele. Osyny eskergen óńirlik ýnıversıtet jańashyldary atalǵan jobany Belarýs eliniń Iаnka Kýpala atyndaǵy Grodno memlekettik ýnıversıtetimen jáne «Aktıýbrentgen» AQ-pen birlese otyryp, iske asyrýdy uıǵarypty. Shyntýaıtyna kelgende, búgingi respýblıka mektepterinde fızıka pánine arnalǵan zerthanalyq qural-jabdyqtardyń birqatary eskirip, paıdalanylý múmkindigi tómendep barady. Jubanov atyndaǵy joǵary oqý ornynda joba tolyqtaı jasaqtalǵan jaǵdaıda bul olqylyqtyń ornyn toltyrýǵa jol ashylary anyq. Sonymen birge jergilikti ýnıversıtettegi óndiris orny oqýshylardyń túrli synaqtar men tájirıbelerdi ońtaıly ári tıimdi túrde júrgizýlerine septigin tıgizbek.
Atalǵan joǵary oqý ornynyń rektoraty bastamashy bola bilgen ekinshi bir óndiristik jobanyń da balamasy joq deýge bolady. Q.Jubanov atyndaǵy Aqtóbe óńirlik memlekettik ýnıversıtetiniń prorektory Rahym Beknazarovtyń málimdeýinshe, bul joba óndiristik qaldyqtardy óńdep, odan hrom alýdy kózdeıdi. Osy erekshe tehnologııalyq úrdisti jolǵa qoıý úshin temir balqytý peshi satyp alynǵan. Onyń quny 85 mıllıon teńgeni quraıdy, baǵasy joǵary ınnovasııalyq qural-jabdyq «Traktor» JShS aýmaǵyna ornalastyrylǵan. Sóıtip aldaǵy kezde Jubanov ýnıversıtetindegi tehnıka fakýltetiniń «Metallýrgııa» kafedrasy bul jobanyń basy-qasynda bolmaq. Ony júzege asyrý maqsatynda joǵary oqý orny men «Qazhrom» AQ arasynda kelisimshart jasalǵan. Soǵan sáıkes, osy kásiporynnyń óndirisinen shyqqan qaldyqtardy ýnıversıtet ǵalymdary men stýdentteri óńdep, budan hrom alýdy josparlap otyr. Olardyń múmkindikteri bir aıdyń ishinde 10 tonna qaldyqty óńdeýge eseptelgen.
Temir QUSAIYN,
«Egemen Qazaqstan»
AQTО́BE
