Syrym aýdandyq bilim berý bólimi men aýdandyq kásipodaq uıymynyń uıymdastyrýymen ótken saıysta muǵalimder aqynnyń óleńderin mánerlep oqyp, Qadyrǵa óleń arnap, aqyn sózine jazylǵan ánderdi oryndady.
Baıqaýdyń «Sózdiń bári qudiretti» atty bóliminde aqyn shyǵarmalaryn mánerlep oqýdan Buldyrty orta mektebinen kelgen Mıra Nesipqalıeva bas júldeni enshiledi. «Qýyp shyǵar qyzyl sózdi oı keıin» atalymynda Tasqudyq negizgi mektebinen kelgen Satym Qajygereevke bas báıge buıyrdy. Al Qadyr aqynnyń sózine jazylǵan ánderdi oryndaý talap etilgen «Keıbir jyrym dán ushyryp qyrmanda, keıbir jyrym baqtashy bop júr mańda» atty bólimde Tasqudyq negizgi mektebinen Nurgúl Talblımova jeńimpaz atandy.
– Jas urpaqqa bilim berip júrgen ustazdar qaýymynyń Qadyr Myrza Áli aqynnyń shyǵarmashylyǵyn jete bilýi óte mańyzdy. Áıgili aqyn týǵan topyraq ókili bolǵandyqtan bizdiń moınymyzda erekshe jaýapkershilik bar, – deıdi Syrym aýdany ákiminiń orynbasary Aslanbek Sarqulov.
Baıqaýdan soń jeńimpazdar men júldegerler Jympıty selosyndaǵy Qadyr eskertkishine gúl shoǵyn qoıyp, aqyn arýaǵyna qurmet kórsetti.
Qazbek QUTTYMURATULY,
«Egemen Qazaqstan»
Batys Qazaqstan oblysy
