№3 Otbasy densaýlyq ortalyǵy memleket-jekemenshik seriktestigi aıasynda boı kótergen nysan. Qurylys jumystaryn júrgizý men medısınalyq jabdyqpen jabdyqtaý úshin jeke kásipker D.Myrzaǵalıev 400 mln teńge kóleminde qarajat jumsaǵan. Jalpy aýdany 1 140 sharshy metrden turatyn ǵımaratta dárigerler bir aýysymda 150 adamdy qabyldaýǵa qaýqarly. Turǵyndar kóp ornalasqan aýdanda boı kótergen Otbasy ortalyǵy bastapqy medısınalyq-sanıtarlyq kómektiń qoljetimdiligin arttyratyn bolady.
– Ortalyqta barlyq jaǵdaı jasalǵan. Atalǵan óńir turǵyndary úshin kórsetiletin kómek sapaly bolady degen úmittemiz. Bul jerde jalpy praktıkadaǵy dárigerler, terapev, pedıatr, akýsher-gınekologtar jumys isteıdi, fýnksııaly dıagnostıka kabınetteri bar. Rentgen apparaty qoıylady. Sonymen qatar bolashaqta salalyq mamandar da qyzmet kórsetedi dep josparlaýdamyz, – deıdi ortalyq dırektory Roza Razıeva.
Otbasy ortalyǵy – Qaraǵandy qalasyndaǵy №1 emhananyń besinshi fılıaly. Bul jerde 20 myń adamǵa deıin qyzmet kórsetiledi. Qyzmetkerlerge jáne kelýshilerge qolaıly bolýy úshin ǵımaratta basqa emhanalarda qarastyrylmaǵan jeldetý júıesi ornatylǵan.
Oblystyq densaýlyq saqtaý basqarmasynyń basshysy Erlan Nurlybaevtyń aıtýynsha, oblys boıynsha bir dárigerge ortasha eseppen 2 myń adam bekitilgen. Fılıaldardy irilendirý bul kórsetkishti 1500 adamǵa deıin azaıtýǵa múmkindik beredi eken.
– Mine, taǵy da bir medısına ortalyǵy ashyldy. Jańa jyldaǵy bul jańalyq turǵyndar úshin qýanyshty jaǵdaı. Nysan memleket-jekemenshik seriktestigi aıasynda salynǵan. Al, oblys boıynsha jalpy 21 áleýmettik memlekettik nysan boı kóterdi. Bul respýblıka boıynsha óte jaqsy kórsetkish. Osy arqyly birneshe jyldar boıy sheshimin tappaı kelgen áleýmettik máselelerdi sheshýge múmkindik aldyq, – deıdi aımaq basshysy E. Qoshanov.
Jaǵdaıattyq ortalyqtyń basty mindeti – oblysta ınsýlt aýrýyna shaldyqqandarǵa kómek kórsetýdi uıymdastyrý. Iаǵnı dáriger naýqasqa baratyn jedel járdem jolǵa shyqqan sátten bastap, aýrýhanaǵa jetkizilgenge deıingi jaǵdaıdy baqylap otyrady. Qaraǵandy oblysy boıynsha aqparatty jınaýǵa múmkindik beretin arnaıy syzba arqyly onlaın rejimde jumys jasaıtyn ortalyqta ınsýlt tıpteri boıynsha aqparatty qadaǵalap, ár kúnge monıtorıng júrgizilip otyrady.
Al, 2017 jyldyń 1 naýryzynda 215 orynǵa arnalǵan Neırohırýrgııa jáne nevrologııa ortalyǵy ashylǵan bolatyn. Qazir ortalyqta angıografııalyq qondyrǵymen operasııalyq blok jumys jasaýda. «Philips» fırmasynyń «Allura Centron» angıograf apparatymen tamyrishilik, shaǵyn ınvazııalyq ádister arqyly ınsýlt, anevrızm, malformasııa, stenoz sııaqty aýrýlarǵa ota endovaskýlıarly túrde jasalady.
Osydan biraz ýaqyt buryn ǵana mıdaǵy anevrızmany kesip alyp tastap, úsh kún ótken soń naýqasty aýrýhanadan shyǵarý degen qııal sekildi bolatyn. Alaıda bizdiń neırohırýgter úshin mundaı ota jasaý «Philips» fırmasynyń «Allura Centron» jańa angıografynyń arqasynda múmkin bolyp otyr. Bul qurylǵynyń kómegimen kúrdeli qan tamyry ishinde jasalatyn operasııalardy shaǵyn ǵana tilik arqyly jasaýǵa bolady. Ol óz kezeginde anaǵurlym tezirek saýyǵýǵa septigin tıgizedi. Sonymen qatar bul apparat qan tamyrlary aýrýlaryn barynsha dálirek dıagnostıkalaýǵa kómektesedi.
Aıta ketý kerek, medısına ortalyǵynda aıynda ınsýlt bólimi men neırohırýrgııa jáne nevrologııa ortalyǵy ashylǵaly ınsýlttiń saldarynan qaza bolý jaıttary azaıǵan.
Naýqastardy derttiń alǵashqy 40 mınýtynda aýrýhanaǵa jetkizý kórsetkishteri de 2016 jylǵy 35%-ben salystyrǵanda 2017 jyly 85%-ǵa deıin joǵarylaǵan. Dárigerlerdiń aıtýynsha ınsýlt kezinde naýqasty aıaq-qol tartylýdan saqtap qalýǵa nemese ómirin arashalap qalýda birinshi saǵat – eń mańyzdy merzim. – Bul apparat bizge 3D rejimde bolyp jatqan barlyq jaıtty kórýge, anaǵurlym naqty dıagnoz qoıýǵa, shuǵyl túrde naýqasqa qajetti otany jasaýǵa múmkindik beredi.
Jańa angıografpen jumys isteý úshin bizdiń mamandar Astanada tájirıbeden ótip qaıtty. Qazirdiń ózinde biz joǵary tehnologııalyq otalardy jasap jatyrmyz. Aıta ketý kerek, shetelderde mundaı otalar óte qymbat. Sebebi, olar shyn mánisinde adamdardyń ómirin saqtap qalady. Bul bolashaqqa qadam, – dedi oblystyń bas neırohırýrgi Ǵabıt Mahambaev.
Qaraǵandylyq neırohırýrgter naýqastardyń ómirin burynǵydan da kóbirek arashalap qalýǵa múmkindik alyp otyr.
Mıras ASAN,
«Egemen Qazaqstan»
Qaraǵandy
