Bıyl bul jarysta aqparattyq tehnologııalar salasynda qyzmet etip júrgen Oljas Aıtbek, Islam Mádenıet, Dáýren Malaev, Araı Sabyrjan men Sergeı Tıannyń joly boldy. Endi olar jarty jylǵa Kremnıı jazyqtyǵyna tájirıbe jınaqtaý úshin jolǵa shyǵady.
Bul baıqaýǵa qatysýǵa 43 adamnan ótinim kelip túsken. Onyń ishinde 19 avtor kelesi týrǵa ótti. Ekinshi týrǵa ótkender eki taraptyń, ıaǵnı qazaqstandyqtar men osy iske múddelilik tanytyp otyrǵan amerıkalyqtardyń birlesýimen ótken áńgimelesýge qatysty. Nátıjesinde, joǵaryda aty atalǵan bes adam iriktelip, bilim granttaryna ıe boldy. Bul grant tájirıbe jınaqtaýshylardyń barlyq shyǵyndaryn óteıdi.
Aıtqandaı, bul baıqaý bıyl ekinshi ret uıymdastyrylyp otyr. Onyń jeńimpazdarynyń baǵdarlamalaý, málimetter bazasyn josparlaý mashyqtary óte joǵary.
Otandastarymyzdyń árbireýine eki amerıkalyq startaptan talasyp otyr desek te bolady. Olardyń ishinde Amplifylive, Hexa, Vimchat, 11sight, Powr syndy alpaýyttar da bar.
– Jeńimpazdardyń keıbirimen jumys istep úlgerdik. Biz startaptardy tańdap bitken soń vıza máselesin sheshýmen aınalysamyz. Biz úshin olardyń tájirıbesin óz elinde paıdalanyp, amerıkalyqtarmen de áriptestikti úzbeı, Qazaqstanǵa qaıtyp oralǵany asa mańyzdy, – deıdi osy baıqaýdy uıymdastyrǵan akademık Shahmardan Esenov atyndaǵy ǵylymı-bilim berý qorynyń baǵdarlamalar menedjeri Ilzıra Aldaǵarova.
О́z kezeginde alǵashqy baıqaýdaǵy jeńimpazdardyń joǵary biliktiligine kózderi jetken amerıkalyq tarap ta jaqsy pikir bildirip otyr.
– Biz Qazaqstanmen 2016 jyldan bastap jumys isteı bastadyq. Sol kezde jeńimpazdar arasynan Abaı Núsipbekovti tańdap, ol bizben birneshe aı jumys istedi. Onyń kásibı deńgeıi óskeni sonshalyqty, nátıjesinde Abaıdy tolyq jumys kúnine qyzmetke jaldadyq. Ol qazir Qazaqstanda otyryp, bizdiń ınjenerlik bólimdi basqarady. Bıyl ekinshi ret atalmysh Qormen áriptestik aıasynda jeńimpazdardyń aıryqsha qabiletine qaıran qalyp otyrmyz. Múmkindik bolsa, bárin de qyzmetke shaqyrar edik. Is júzinde árqaısysy kez kelgen kompanııada jumys isteı alady, – deıdi AmplifyLive negizin qalaýshylardyń biri ári bas dırektory Braıan Kentı.
Qazirgi tańda alǵashqy baıqaýdyń úsh jeńimpazy Qazaqstannan jyraqtaǵy startaptarda jumystaryn jalǵastyrýda. Al Aıgúl Imadıldaeva tikeleı Jazyqtyqtyń ózinde qyzmet etýde.
Osy arada amerıkalyqtardyń kelesi baıqaýdy ótkizýge Aıgúldiń tikeleı yqpal etkenin aıta ketken jón. San-Fransıskodan bir-aq shyqqan jerlesimiz óziniń komandada myqty baǵdarlama ázirleýshi ekenin dáleldegen. Osyndaı tabysty áriptestikten keıin POWr startapynyń HR mamany MakKenzı Rıng Qazaqstanmen jumys jasaýdy jalǵastyrýǵa sheshim qabyldaǵandaryn aıtady.
Aınash ESALI,
«Egemen Qazaqstan»
ALMATY
