Erlan Saǵadıev pen Mańǵystaý oblysynyń ákimi Eraly Toǵjanov Sh.Esenov atyndaǵy KMTjIÝ professorlary men oqytýshylaryna arnalǵan 75 páterlik úıdiń ashylý rásimine qatysyp, 10 ustazǵa jańa páterdiń kiltin berdi.
«Qazaqstan Respýblıkasynyń Prezıdenti N.Á.Nazarbaevtyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Qazaqstan halqyna Joldaýynda pedagogtar aldynda bilim berý men ǵylymdy damytý boıynsha naqty mindetter qoıylǵany barshamyzǵa málim. «Rýhanı jańǵyrý» baǵdarlamasy aıasynda alǵash ret oblystaǵy barlyq bilim berý uıymdarynda «Jasyl mektebim – jasyl mekenim» atty jobasyn iske qostyq. Joba aıasynda kezeń-kezeńimen barlyq mektepterde jylyjaılar salynyp, mektep aýlalary kógaldandyrylatyn bolady. Aımaqtyń klımattyq ereksheligine baılanysty qolǵa alynyp otyrǵan bul joba mesenattar tarapynan qoldaý tapty», dedi aımaq basshysy Eraly Toǵjanov.
«Elbasy Joldaýyndaǵy kórsetilgen mindetterdiń arasynda bilim salasyna arnalǵan birqatar tapsyrma bar. Árıne onyń bárin uıymdastyryp, oryndaý úshin ustazdardyń mártebesin kóterý kerek. Mine búgin de olarǵa kórsetilgen qamqorlyq pen iltıpattyń kýágeri bolyp otyrmyz. Jańa qonysty bolǵan ustazdardy mınıstrliktiń atynan quttyqtaımyn! Shańyraqtaryńyz shattyqqa tolsyn!» dedi quttyqtaý sózinde Bilim jáne ǵylym mınıstri Erlan Saǵadıev.
«Sıfrly Qazaqstan» baǵdarlamasy aıasynda mektepter 90% keń jolaqty ınternet jelisimen qamtamasyz etildi. Osy jyldyń sońyna deıin ınternetpen qamtý máselesi tolyqtaı sheshiledi. Mınıstrlik tarapynan 600-den astam muǵalim aǵylshyn tili kýrstarynan ótip, jergilikti bıýdjet qarjysyna 300 aýyl muǵalimi aǵylshyn tilin meńgerýde. Qańtar aıynan bastap oqýshylarǵa óz kásibin ashýdy úıretý maqsatynda oblystyń 30 mektebinde kásipkerlik negizderi jańa jobasyn bastaldy.
Mınıstr Mańǵystaý oblysynyń joǵary oqý oryndarynyń akademııalyq keńesterimen kezdesip, Elbasynyń «Tórtinshi ındýstrıaldy revolıýsııa jaǵdaıynda jańa damý múmkindikteri» Joldaýyn talqylady.
Gúlaıym ShYNTEMIRQYZY,
«Egemen Qazaqstan»
