Osy baǵdarlamada kórsetilgen maqsat-mindetterdi iske asyrý aıasynda QR Ulttyq kitaphanasynyń bastamasymen jáne QR Mádenıet jáne sport mınıstri A. Muhamedıulynyń qoldaýymen Qazaqstan men Kýveıt arasyndaǵy mádenıaralyq baılanystardy nyǵaıtýǵa úlken qadam jasaldy. Ál-Kýveıt qalasynda 11-15 qańtarda jyl saıyn uıymdastyrylatyn ál-Karın festıvaline Qazaqstannyń «Astana-Opera» sımfonııalyq orkestri qatysyp, Maıra Muhamedqyzy, Medet Shotabaev, Abzal Muhıtdınov, Aısulý Ábilhanova, Rýslan Baımýrzın sııaqty elimizdiń tanymal óner qaıratkerleri óner kórsetip qaıtty dep habarlady QR Ulttyq kitaphanasynyń baspasóz qyzmeti. Orkestr Qurmanǵazy Saǵyrbaev, Nurǵısa Tilendıev sııaqty tanymal qazaq kompozıtorlarynyń tańǵajaıyp shyǵarmalaryn oryndap, óner súıer qaýymynyń zor qoshemetine bólengen.
Kýveıt memleketinde ótken ál-Karın festıvali shyn daryndylardyń basyn qosyp, erekshe formatta uıymdastyrylǵanyn, elimizden barǵan orkestr ultymyzdyń tańǵajaıyp shyǵarmalaryn oryndap, Kýveıt jurtshylyǵynyń tańdaıyn qaqtyrǵanyn jetkizgen ánshi Maıra Muhamedqyzy: «Kýveıtte jyl saıyn ótkiziletin ál-Karın Festıvali joǵary dengeıde ótti. Kýveıt óte baı, dáýletti xalyq eken. О́kimettiń ónerge, bilimge bólingen qarajattary men bolashaq urpaǵyna qaldyrǵan murasyn estiseńiz, ǵajaıyp, adam balasy sengisiz sıfrlar! Konsert keremet ótti! Kórermender qımastyqpen zaldan áreń ketti. Aıtpaqshy, Kýveıtte keremet Opera teatry bar eken, maǵan opera aıtýǵa usynys jasady» – deıdi.
Taǵy bir atap óterligi, 14 qańtarda QR Ulttyq kitaphanasy men Halyqaralyq áıelder toby (International Women’s Group) birlesip, Mádenıet jáne sport mınıstrligi jáne Qazaqstannyń Kýveıttegi Elshiliginiń qoldaýymen «Kazakhstan Time» Qazaqstan kúnin uıymdastyrǵan.
Qazaqstan kúni aıasynda Kýveıt Ulttyq kitaphanasymen ekijaqty kezdesýler ótip, kelissózder júrgizilgenin jetkizgen QR Ulttyq kitaphanasynyń baspasóz qyzmeti, qazaqstandyq delegasııa Kýveıt Ulttyq kitaphanasynyń dırektory Kemal myrzamen kezdesip, kitapxana jumystarymen tanysqanyn, taraptar áriptestik yntymaqtastyqqa keliskenin habarlady. QR Ulttyq kitaphanasy men Ál-Baptın Arab poezııasy Ortalyq ǵylymı kitaphanasynda, Mádenıet jáne kitaphana salasyndaǵy yntymaqtastyq týraly memorandýmǵa qol qoıý rásimi de joǵarǵy deńgeıde ótken.
– Endi eki kitapxananyń mamandary kóne qoljazbalardy zertteý tájirıbelerimen, mamandarmen, sondaı-aq sırek kitaptar men qoljazbalardyń kóshirmelerimen almasatyn bolady. Bul biz úshin zor mártebeli jetistik, – deıdi QR Ulttyq kitaphanasynyń dırektory Janat Seıdýmanov. Kýveıt memleketindegi Qazaqstan kúni aıasynda ótken sharalar jergilikti buqaralyq aqparat quraldarynyń nazarynda bolǵan. Atap aıtqanda, eki el arasyndaǵy qarym-qatynastyń nyǵaıýyna sebep bolǵan mańyzdy sharalar Kýveıt eliniń 11 baspasózi men ulttyq arnalarynan berilip, halyqqa keńinen nasıhattalǵan. Bıyl Qazaqstan Respýblıkasy men Kýveıt memleketi arasyndaǵy dıplomatııalyq qarym-qatynastyń ornaýyna 25 jyl tolýda. Osy aıtýly mańyzdy oqıǵaǵa oraı, endi eki el arasyndaǵy mádenı baılanys nyǵaıyp, ortaq tarıhı tamyr, mádenıet pen dástúrdi biriktirýde. Ulttyq qundylyqtarymyz ben rýhanı baılyǵymyzdy shet memleketterge tanystyrý men dáripteýde birqatar isterdiń bastamashysy bolǵan QR Ulttyq Kitaphanasy mamandary ozyq oıly ult, irgesi berik el, bilimge qushtar jurt ekenimizdi kórsetýde aldaǵy ýaqyttyń enshisinde áli de atqarylar qyrýar sharýa kútip turǵanyn jetkizdi.
Mıra BAIBEK,
«Egemen Qazaqstan»
ALMATY
