Mınıstrdiń aıtýynsha, byltyr Qazaqstan týrızmdi órkendetý turǵysynan jańa kezeńge qadam basqan. Ásirese, halyqaralyq mamandandyrylǵan EKSPO kórmesi osy salany damytýǵa úlken múmkindikter jasaǵan. «Kórmeni sátti ótkizýdiń arqasynda elimiz Batys jáne Shyǵys mádenıetiniń qıylysqan tusyndaǵy jańa týrıstik destınasııa retinde tanyldy. Osylaısha, táýelsizdik alǵaly alǵash ret Qazaqstan álemdik týrızm kartasynda aıqyn keskinge ıe boldy», dedi mınıstr.
Týrızm salasyn órkendetý baǵytynda atqarylyp jatqan jumystarǵa toqtalǵan A.Muhamedıuly osy salanyń ishki jalpy ónimdegi úlesin 2016 jylǵy 1 paıyzdan 2025 jyly 8 paıyzǵa jetkizý josparlanyp otyrǵanyn jetkizdi. Osyǵan baılanysty byltyr biraz ister tyndyrylǵan. Aıtalyq, týrıstik salany damytýdyń 2023 jylǵa deıingi jańartylǵan tujyrymdamasy qabyldanǵan. Salany damytý tarıhynda alǵash ret Mádenıet jáne sport mınıstrligi men elimizdiń óńirleri arasynda yntymaqtastyq týraly memorandýmdarǵa qol qoıylǵan. Sondaı-aq týrızmi qarqyndy damyǵan aldyńǵy qatarly memleketterdiń úzdik tájirıbeleri boıynsha memlekettik deńgeıde týrızmdi basqarý jónindegi keńse qurylypty.
Mınıstrlik elimizge keletin týrıster aǵymyn kóbeıtý úshin vızalyq-kóshi-qon rejimin de ońtaılandyrý jumystaryn bastaǵan. Máselen, qazirdiń ózinde biregeı vızasyz rejim engizilip, ol 2018 jyldyń sońyna deıin uzartylǵan. Mysaly, Almaty men Astana qalalary arqyly ótetin Qytaı Halyq Respýblıkasy azamattary úshin 72 saǵattyq tranzıt engizilip, sonyń nátıjesinde tek EKSPO kórmesine osy elden 4,5 myń týrıst kelgen eken. Endi osyndaı rejimdi Úndistan azamattary úshin de engizý josparlanyp otyr.
Elimizdiń syrtqy týrızmi ǵana emes, ishki týrızmdi damytýǵa da kúsh salynýda. Byltyrǵy toǵyz aıdyń kórsetkishi boıynsha ishki týrızmdegi aǵym burynǵydan 25 paıyzǵa artyp, 3,5 mln adamdy quraǵan.
Mınıstr Qazaqstandaǵy kórikti oryndardy álemge dáriptep, týrızmniń qaınaǵan ortasyna aınaldyrý baǵytynda da birqatar jumystar qolǵa alynǵanyn aıtty. Máselen, Astana men Shýche-Býrabaı kýrorttyq aımaǵynyń ınfraqurylymyn damytýdyń baǵdarlamalyq qujattary qabyldanǵan.
Alaıda óz elimizde de maqtan eterlik kórikti mekender kóp bolǵanymen, ondaǵy qyzmet kórsetý sapasy men baǵasy kóńil kónshite bermeıdi. Býrabaıda demalǵannan góri Túrkııada tynyqqan arzanyraq dep halyq bekerden-beker aıtpasa kerek. Osy máseleni kóterip, saýal qoıǵan jýrnalıstiń suraǵyna mınıstr halyqaralyq standarttardy engizý arqyly barlyq demalys ornyndaǵy qyzmet kórsetý sapasyn kóterýdi maqsat etip otyrǵanyn aıtty. «Bul ahýaldy túzep, týrıster legin arttyrý úshin Shýche-Býrabaı kýrorttyq aımaǵyn damytýdyń túbegeıli ádisi qabyldandy. Birinshi kezekte jol ınfraqurylymy jaqsaryp, qyzmet sapasy túzetiletin bolady», dedi ol. Onyń aıtýynsha, Býrabaıda týrısterge qolaıly jaǵdaı jasaý úshin jańa nysandar salynady. Býrabaı kólinen basqa, Úlken jáne Kishi Shabaqty kólderin abattandyrý da josparlanyp otyr. Mınıstrdiń sózine sensek, 2018-2019 jyldary Shýche-Býrabaı kýrortty aımaǵyndaǵy ahýal múldem basqasha túrlenip, adam tanymastaı ózgermek. «Jalpy týrızmdi damytýǵa qatysty jospar kóp. Ásirese, «Rýhanı jańǵyrý» baǵdarlamasyn iske asyrý arqyly ishki týrızmdi damytýdy yntalandyrýdy jalǵastyrmaqpyz. Ishki jáne syrtqy týrızmdi damytý úshin aýqymdy aqparattyq naýqandy iske qosý josparlanyp otyr. Budan ózge, elektrondy vızany engizý de týrıster aǵymyn kóbeıtedi degen senimdemiz. Eń bastysy, týrızmge degen jańa kózqaras qalyptasyp, álemdegi eń úzdik týrıstik klımat qalyptastyra alýymyz kerek», dedi ol.
Qymbat TOQTAMURAT,
«Egemen Qazaqstan»
