Joǵarǵy sot keńeıtilgen keńes ótkizdi

Is-sharaǵa Prezıdent Ákim­shiligi Basshysynyń orynbasary Talǵat Donaqov, Joǵary sot Keńesiniń tóraǵasy Anatolıı Smolın, Parlament Senaty men Májilisindegi komıtetterdiń tóraǵalary Georgıı Kım men Nurlan Ábdirov, Qazaqstan Respýblıkasyndaǵy Adam qu­qyq­tary jónindegi ýákil Asqar Sháki­rov, Qazaqstan halqy Assam­bleıasy Tóraǵasynyń orynba­sary Darhan Myńbaı,  Res­pýb­lıkalyq advokattar alqa­sy­nyń tóraǵasy Ánýar Túgel qa­tysty.

Keńeske Bas proký­ra­tý­­ra­­nyń, Ádilet mınıstr­li­gi­­niń, «Ata­meken» UKP, res­pýb­lı­ka­lyq notarıat­tar palatasynyń, advokat­tar alqasy­nyń ókilderi, otstav­kadaǵy sý­dıa­lar, sondaı-aq ha­lyq­aralyq sa­rap­shylar shaqy­ryldy. Son­daı-aq otyrysty beı­ne­baı­lanys arqyly jergilikti sot­tar, oblystardyń, Astana jáne Almaty qalalary ákimderi­niń orynbasarlary, óńirlerdegi prokýratýra, advokatýra, «Ata­meken» UKP jáne  ózge de memle­kettik organdardyń ókilderi baqylady.

Keńestiń alǵashqy bóli­ginde Joǵarǵy sottyń alqa tór­aǵalary qylmystyq, aza­mat­tyq, ákimshilik ister jáne ınves­tısııalyq daýlar boıynsha sot tóreligin júzege asyrýdyń qorytyndysy týraly baıandady. Budan ári J.Asanov sóz sóılep, sot júıesi qyzmetiniń ózekti máselelerine toqtalyp ótti. Atap aıtqanda, ol taıaý bolashaqta sottyń qalaı ózge­re­tini, Qazaqstan damyǵan elder­diń «otyzdyǵyna» kirýi úshin sot bıligi men árbir sýdıa ne isteýi ke­rektigi jóninde, azamattardyń sot­tarǵa senimin arttyrýdyń jol­dary týraly oılarymen bólisti.

Joǵarǵy sot Tóraǵasy ózi­niń úndeýi boıynsha sýdıalar korpýsy, prokýrorlar, advokat­tar, memlekettik organdar men azamattyq qoǵamnyń ózge de ókilderi tarapynan kóptegen usynys-pikirlerdiń kelip tús­kenin málimdedi. Ol «100 naqty qadam» Ult josparyn, «Sıfr­ly Qazaqstan» jáne «Rýhanı jań­ǵyrý» baǵdarlamalaryn iske asyrý turǵysyndaǵy sot júıe­sin odan ári jańǵyrtý boıynsha usynystar kelip túskenin atap ótti.

Al alqaly jıynnyń ekin­shi bóliginde Sot jıýrıiniń tór­aǵasy Morıak Shegenov, Sot tóreligi akademııasynyń rektory Tólesh Qaýdyrov jáne birqatar oblystyq sottardyń tóraǵalary óz qyzmetteri týraly baıandady. Joǵary Sot Keńesiniń tóraǵasy Anatolıı Smolın de sóz sóıledi.

J.Asanov is-sharany aıaqtaı kele, barlyq sýdıalar men qoǵam ókilderin sottar qyzmetin jaqsartý baǵytyndaǵy jumysqa belsene qatysýǵa shaqyrdy.

Aıta keteıik, jıyn sońynda 2017 jylǵy respýblıkalyq baı­qaý-konkýrstyń jeńimpazdaryn marapattaý rásimi ótti. Aýdandyq jáne oǵan teńestirilgen sottar arasynda Soltústik Qazaqstan oblysynyń qylmystyq ister jónindegi mamandandyrylǵan aýdanaralyq soty – birinshi, Ońtústik Qazaqstan oblysynyń Arys aýdandyq soty – ekinshi, Atyraý oblysynyń Mahambet aýdandyq soty úshinshi oryndy ıelendi. Oblystyq jáne oǵan teńestirilgen sottardyń ara­­synda Pavlodar (1-oryn), Aq­­tó­be (2-oryn) jáne Shyǵys Qa­zaq­stan oblystyq (3-oryn) sot­tary úzdikter qatarynan kó­rindi.

Nurlybek DOSYBAI,

«Egemen Qazaqstan»