Aldymen «The Craiova International Shakespeare Festival» – uly dramatýrg Ýılıam Shekspırdiń shyǵarmashylyq murasyn zamanaýı turǵyda zerdeleýge, teatr ónerin damytýǵa, tájirıbe almasýǵa baǵyttalǵan eń aıtýly halyqaralyq teatr alańdarynyń biri ekenin aıta ketý kerek. Bul festıval 1994 jyldan beri Kraıova qalasyndaǵy Marın Soreský atyndaǵy ulttyq teatrdyń bastamasymen araǵa jyl salyp ótip keledi. Bıylǵy óner dodasynda álemniń 28 elinen kelgen 90 shaqty shyǵarmashylyq ujym toǵysyp, on kúnde kórermenderge shamamen 300 mádenı is-shara usynylǵan.
Almatydaǵy Memlekettik akademııalyq qýyrshaq teatry aıtýly sharaǵa 2025 jyly Fransııanyń Avınon qalasynda ótken halyqaralyq «Off Avignon» teatr festıvalinde shaqyrtý alǵan. Onda da teatr mamandarynyń nazaryn «Romeo men Djýletta» spektaklindegi erekshe kameralyq ınterpretasııasy arqyly aýdartqan.
Álemge áıgili mahabbat hıkaıasy 2019 jyly rejısser Dına Jumabaevanyń jetekshiligimen sahnalansa, qoıylymnyń horeografy Anna Soı men qoıýshy-sýretshisi Iýlııa Chernovany da atap ótý lázim.
«Romeo men Djýletta» spektakli buǵan deıin de Fransııa, Kanada, Bolgarııa, Reseı, Túrkııa jáne elimizdegi halyqaralyq teatr festıvaldarynda joǵary marapattarǵa ıe bolsa, Kraıova qalasyndaǵy qoıylymda Ulan Adambaev, Bota Tabyldıeva, Maqsat Kamalov, Shohan Qulnazarov, Elmıra Qumarova, Araılym Baıyrbekova syndy akterler óner kórsetti.
Kraıovadaǵy kórsetilim kórermenniń úlken qoshemetine bólengenin lyq toly zal men spektakl aıaqtalǵannan keıingi uzaq qol shapalaqtaýdan bilýge bolady. Ártisterdiń shynaıy oıyny, qýyrshaq júrgizýdegi sheberligi, ıkemdiligi men horeografııanyń úılesimdi úndestigi, sondaı-aq ssenografııalyq sheshimniń tutastyǵy teatr mamandary tarapynan joǵary baǵalandy. Festıval qonaqtary men halyqaralyq teatr qaýymdastyǵynyń ókilderi qazaqstandyq qýyrshaq óneriniń joǵary kásibı deńgeıin atap ótti.
Kórsetilimnen keıin teatr ujymy 2027 jyly Rýmynııada ótetin «The International Theatre Festival «Elvira Godeanu» halyqaralyq teatr festıvaline qatysýǵa shaqyrtý aldy.
ALMATY
