Baǵdarlamany júzege asyrýda turǵyn úı qurylysyna basymdyq berilgeni aıan. Bir jyl ishinde Mańǵystaý oblysynda bul maqsatqa barlyq qarjy kózderinen bólingen qarjyǵa 833, 022 sharshy metr úı salyndy. Bul ótken jylmen salystyrǵanda 17 paıyzǵa artyq kórsetkish. Al salynǵan páter sanyna shaqqanda oblys aýmaǵynda 7011 páter óz ıelerin qýantty degen sóz. Onyń ishinde kóship kelýshileri kóp, jurttyń armanyna aınalǵan oblys ortalyǵy Aqtaý qalasynyń úlesi qashanda zor. «Nurly jer» baǵdarlamasy boıynsha Aqtaýda jańa shaǵyn aýdandar kólemi ulǵaıyp, 34-shaǵyn aýdan, 32 a, 17, 31 b, 32 b jáne «Shyǵys» shaǵyn aýdandarynda ásem úıler boı kóterdi. Bul úılerge ótken jyly 3952 otbasy qonys tepti.
Baǵdarlamada aıtarlyqtaı qarqynǵa ıe baǵyt – nesıelik turǵyn úı salýǵa jalpy aýmaǵy 83,641 sharshy metrlik 1198 páter úshin 4452,379 mln teńge bólindi. 528 páterdiń qurylysy aıaqtalyp, qoldanysqa berildi. Aqtaý qalasyndaǵy 34-shaǵyn aýdandaǵy jerasty parkıngi bar kóp páterli turǵyn úı qurylysy men Munaıly aýdanynyń Mańǵystaý aýylyndaǵy 24 páterli 12 jaldyq úıdiń qurylysy aıaqtalsa, oblys ortalyǵyndaǵy kóp páterli turǵyn úı qurylysy bıyl aıaqtalady dep josparlanǵan.
Satyp alý quqyǵynsyz jaldyq turǵyn úı qurylysy da qarqyndy júrýde. Atalmysh baǵyt úshin 1 404,664 mln teńge bólinip, eki nysan salynyp jatyr. Biri – Munaıly aýdanynyń Mańǵystaý aýylynda salynyp jatqan 24 páterli 8 úı bolsa, ekinshisi – osy aýdannyń Batyr aýylyndaǵy 4 páterli 40 úı. Munaıly – táýelsizdik alǵan soń elimizde alǵash ashylǵan aýdan bolǵanmen, Mańǵystaý oblysy boıynsha halqynyń sany jaǵynan aldyńǵy qatarda tur. Oǵan aýdannyń oblys ortalyǵyna qanattas ornalasýy sebep bolsa kerek. Turǵyndar sany jyldan-jylǵa artyp kele jatqan aýdanda turǵyn úı eń basty, eń qajetti másele. Batyr aýylynda jospar boıynsha salynýǵa tıisti 64 páterdiń 16-sy salynyp bitse, qalǵan úılerdiń qurylysyn bıyl aıaqtaý mejelenip otyr.
«Nurly jer» baǵdarlamasyn iske asyrýda Qazaqstannyń ıpotekalyq kompanııasynyń, ulttyq kompanııalardyń, jeke kompanııalar men jeke turǵyn úı salýshylardyń úlesi zor.
2017 jyly Mańǵystaý oblysynda barlyq qurylys-montaj jumystaryna 197 mlrd teńge bólingen bolsa, «Nurly jer» boıynsha úı salý úshin Ulttyq qordan 9 mlrd 675 mln teńge, respýblıkalyq bıýdjetten 262 mln teńge, barlyǵy 9 mlrd 938 mln teńge bólinipti. Qurylys salýǵa qajetti ınfraqurylym jumystary úshin oblysta 2017 jyly 4 mlrd 081 mln teńge qaralyp, bul qarajatqa 10 nysannyń jumysy jasalǵan.
– Aqtaý qalasynda uzaq jyldar boıy páter jaldap júrdik. Jas otbasyna bul ońaı bolǵan joq. Aı saıyn 60-70 myń teńge aqshany páter ıesine sanap bergenshe, osy aqshany óz páterimizge salatyn kún bolsa ǵoı dep armandaıtynmyn. Armanymyz «Nurly jer» baǵdarlamasy arqyly iske asty. Aqtaýdan salynǵan sý jańa úıden 70 sharshy metrge jýyq eki bólmeli úıdiń ıesi atanyp, tek meniń otbasym ǵana emes, búkil aǵaıyn-týys, dos-jarandarymyzben birge máre-sáre boldyq, – deıdi D.Ábdibek esimdi depýtat.
Demek, «Nurly jer» baǵdarlamasy mańǵystaýlyqtardyń úmitin úkilep, alys armanyn jaqyndata tústi. Áli de úı kezeginde turǵandar salynyp jatqan úı qurylystaryna qyzyǵa kóz salyp qoıady...
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
