«Kúntizbelik josparǵa sáıkes, respýblıkalyq deńgeıdegi Qazaqstan kýbogy men Qazaqstan chempıonatyn ótkizbekpiz. Bul bizdiń kezekti jarystarymyz. Onymen qosa basqa federasııalarmen birikken jarystar uıymdastyrylady. Eń mańyzdysyn aıtsam, maýsym aıynyń ortasynda kıokýshınkaı-kan karateden Azııa chempıonatyn ótkizemiz dep josparlap otyrmyz. Ol - halyqaralyq jarys. Qazirgi ýaqytta Halyqaralyq kıokýshınkaı-kan karate federasııasy bizge qoldaý bildirdi. Soǵan saı daıyndyq júrgizilip jatyr. Bizdiń quramamyz nátıjeniń eń joǵarǵy kórsetkishin sol jerde kórsetse eken degen tilegimiz bar», - deıdi Omarhan О́ksikbaev Astanadaǵy «Saryarqa» velotreginde sportshylarmen kezdesý barysynda.
Eske sala ketsek, Ýkraınanyń Odessa qalasynan «altynǵa toly» qorjynmen oralǵan sańlaqtarymyzdyń basyn Ulttyq respýblıkalyq Kıokýshınkaı-kan karate federasııasy búgin Astanadaǵy «Saryarqa» velotreginde qosqan bolatyn. Qazaq sportshylary atalǵan dodadan 12 altyn, 4 kúmis pen 1 qola medal alyp kelip otyr. Federasııa prezıdenti Omarhan О́ksikbaevtyń aıtýynsha, Qazaqstan sportshylary buryn sońdy kıokýshınkaı-kan karateden Álem chempıonatynda mundaı zor jetistikke qol jetkizbegen.
