Elbasynyń bıylǵy Joldaýynyń «Qarjy sektoryn «qaıta jańǵyrtý» 6-baǵytyndaǵy mindetterdi iske asyrý» taqyrybyna arnalǵan baspasóz jıynyna AHQO basqarýshysy Qaırat Kelimbetov, «AHQO ákimshiligi» AQ basqarma tóraǵasynyń orynbasary Marat Áıtenov, AHQO bırja basqarmasy tóraǵasynyń orynbasary Ámına Turǵulova, «AHQO ákimshiligi» AQ sıfrly tehnologııalar dırektory Ásel Jıenbaeva qatysyp, qarjy ortalyǵynyń osy baǵyttaǵy jumystary jaıynda aıtyp berdi.
AHQO bıyl 1 qańtarda zańdy túrde iske qosylǵan bolatyn, sodan beri tolyq jobalyq qýatqa jetý maqsatyndaǵy qarjy ortalyǵynyń qurylymdaryn belsendi túrde óristetý jumystary bastaldy.
«Prezıdent bastamasymen AHQO qarjy tehnologııalaryn, ınnovasııalardy tartý, jasyl tehnologııalardy damytý jáne ınvestısııalardy tartý úshin kóptegen múmkindikter aldy. AHQO-nyń halyqaralyq tanystyrylymy Astananyń damýyna óziniń eleýli úlesin qosady degen senimdemiz», dedi Q.Kelimbetov. Sondaı-aq ol Memleket basshysynyń jaqynda AQSh-qa resmı sapary AHQO jumysyna oń áserin bergenin atap ótti. Máselen, Elbasy AQSh-qa jasaǵan resmı sapary kezinde bıznes kapıtandaryn AHQO alańyna shaqyrdy. AHQO, Bloomberg jáne ABC TV otandyq bıznes arnasy arasynda yntymaqtastyq týraly kelisimge qol qoıyldy. Buǵan qosa sapar barysynda elimizdiń Qarjy mınıstrligi, «Astana» halyqaralyq qarjy ortalyǵynyń bırjasy (AIX) jáne Euroclear banki arasynda yntymaqtastyq týraly memorandým jasaldy. Taraptar Qazaqstandaǵy halyqaralyq klırıng júıesin damytýǵa kelisti. Memorandým naryqtyq ortany qurýdy qoldaý maqsatynda seriktestikte jumys isteý nıetin bildiredi, onda sheteldik ınvestorlarǵa jergilikti qazaqstandyq baǵaly qaǵazdar Euroclear júıesi arqyly qoljetimdi bolady.
Q.Kelimbetov sondaı-aq jaqynda Davosta ótken Búkilálemdik ekonomıkalyq forýmnyń negizgi taqyryptarynyń biri adam kapıtalyn damytý máselesi bolǵanyn tilge tıek etti. BEF alańynyń áleýeti men iskerlik ortanyń bas qosýyn paıdalana otyryp, AHQO Thomson Reuters-pen seriktestikte paneldik sessııa ótkizipti. Atalǵan is-sharada AHQO delegasııasy múddeli toptardy Qazaqstannyń basymdyqtary men elde jasalyp jatqan jaǵdaılar týraly habardar etken.
«Sonymen qatar Waves blokcheın-platformasymen memorandýmǵa qol qoıyldy. Waves-pen jumys isteý arqyly AHQO qazaqstandyq startaptarǵa jobalardy jańa tehnologııalyq deńgeıde damytýdyń biregeı múmkindigin beredi, osylaısha bul bastama Qazaqstanda blokcheın-tehnologııalardy tanytýǵa yqpal etedi», dedi Q.Kelimbetov.
AHQO basshysynyń aıtýynsha, qazirgi tańda ortalyqtyń barlyq baǵyttaryn zańmen retteý prosesi júrgizilip jatyr jáne damýshy naryqtarǵa ınvestısııa salýǵa múddeli halyqaralyq isker toptardy tartýǵa qabiletti óńirlik habty qurýdyń negizgi seriktesteri anyqtaldy. Qor naryǵynyń damýyna «Samuryq-Qazyna» UÁQ-tyń ulttyq kompanııalary aksııalaryn IPO-ǵa sátti ótkizý de yqpal etpek. Búginde IPO-ny tıimdi ótkizý tetigi ázirlenýde. Oǵan qosa AHQO janynan kompanııalardy tirkeıtin jáne qyzmetterdiń keń spektrin lısenzııalaıtyn Qarjylyq qyzmetterdi retteý komıteti (AFSA) jumysyn bastaǵan. AHQO-nyń kommersııalyq jáne azamattyq daýlardy qaraıtyn, aǵylshyn jalpy quqyǵynyń negizinde áreket etetin táýelsiz soty, sondaı-aq Halyqaralyq arbıtraj ortalyǵy qurylypty. Sonymen qatar AHQO bazasynda Shanhaı qor bırjasy men NASDAQ strategııalyq seriktesterine aınalǵan joǵary tehnologııalyq bırja iske qosylǵan.
Dınara BITIK,
«Egemen Qazaqstan»
