О́ńirdegi iri kásiporyndardyń salyq tóleýshilerine, shaǵyn jáne orta bıznes ókilderine, qoǵamdyq birlestikter men basqa da uıymdarǵa arnalǵan semınardy ashqan kirispe sózinde oblys ákiminiń birinshi orynbasary Nurymbet Saqtaǵanov jańa Kodeks adal salyq tóleýshiniń múddesin qorǵaýǵa baǵyttalǵanyn, budan bylaı barlyq túsinispeýshilikter salyq tóleýshilerdiń paıdasyna sheshiletinin atap ótti.
Semınarda sóz alǵan Ulttyq ekonomıka mınıstriniń birinshi orynbasary Rýslan Dálenov «Jańa Salyq kodeksindegi jańa saıasat» atty baıandamasynda Kodekstegi ózgeristerdi jan-jaqty túsindirdi. «Bul Salyq kodeksiniń burynǵylardan ózgeshiligi, artyq kedergilerden arylyp, qarapaıym halyq múddesin qorǵaýǵa basymdyq berilýinde. Sózim dáleldi bolý úshin bir-eki mysal keltireıin. Máselen, buǵan deıin 2017 jyldyń múlik jáne kólik salyqtaryn sol jyldyń 1 qazanyna deıin tóleý kerek bolatyn. Endi jyl qorytyndysy boıynsha tóleısiz. Budan bólek qaryzdy keshirý kezinde jeke tabys salyǵy alynyp tastaldy. Eger bank azamatqa qaryzyn esepke jatqyzsa, onda esepke jatqyzǵan somadan bıýdjetke 10% salyq ustaý qajet emes», dedi ol.
Qazaqstannyń salyq tóleýshiler qaýymdastyǵy basqarýshy keńesiniń tóraıymy Jannat Ertilesova júrgizgen semınar barysynda Qarjy mınıstrligi Memlekettik kirister komıtetiniń qyzmetkerleri salyq saıasatynyń erekshelikteri men jer qoınaýyn paıdalanýshylarǵa salyq salý, arnaıy salyq rejimin jetildirý, QQS qaıtarýdy ákimshilendirý jáne jańa Salyq kodeksiniń basqa da jańashyldyqtaryn muqııat túsindirip, salyq tóleýshiler men býhgalterler tarapynan qoıylǵan barlyq saýaldarǵa jaýap berdi.
Azamat QASYM,
«Egemen Qazaqstan»
О́SKEMEN
