Kóshe ataýlaryn ózgertý týraly sheshim qoǵamdyq keńes otyrysynda ashyq daýys berý arqyly qabyldanǵandyǵyn aıta ketý kerek. Sonyń nátıjesinde Sandyqtaý aýdanyna qarasty Kamenka aýylynyń bıdaı daıarlaý ataýyna ıe Zagotzerno kóshesi Qanaı bı bolyp ózgertildi. Qaı jaǵynan qarasań da bul ataý ózin aqtap tur. Al Vasılevka aýylynyń Shkolnaıa atty kóshesin Saqulaq bı dep ataý týraly sheshim de jergilikti turǵyndardyń kóńilinen shyqqan sııaqty. Sol sııaqty Ulan aýylyndaǵy Gvardeıskaıa kóshesi qazaqtyń beldi úsh bıiniń biri Áıteke bı esimimen atalatyn boldy. Osy eldi mekendegi taǵy bir kóshe, ıaǵnı Stepnaıa kóshesi Qanaı bı ataýyn alsa, Shkolnaıa ataýy Tóle bı bolyp ózgertildi.
Taǵy bir eldi mekendegi, ıaǵnı Mysok aýylyndaǵy Naberejnaıa kóshesi Qazybek bı bolyp shyǵa keldi. Osylaısha buryn eshqandaı tarıhı mańyzy joq kóshe ataýlary qazaqtyń birtýar bıleriniń esimimen ataldy. Qazaq memlekettiginiń nyǵaıýyna jáne quqyqtyq qoǵam qalyptastyrýdaǵy bılerdiń ereń eńbekterin urpaq jadynda máńgi qaldyrý maqsatynda ózgertilgen kóshe ataýlary óskeleń urpaq tárbıesinde ózindik úles qosaryna eshkimniń daýy bola qoımas. Reti kelgende bir kezderi keńestik saıasat saldarynan tarıhı ataýyn joıǵan eldi mekenderdiń óz ataýlaryn ıemdenetin kún de alys emes deýge tolyq negiz bar.
Asqar TURAPBAIULY,
«Egemen Qazaqstan»
Aqmola oblysy
