Baǵdarlamashy maman Meıirhat Tolqynovtyń bastamasymen qolǵa alynǵan sıfrly joba «Jetisý-360» dep atalady. «Sıfrly baǵdarlamany qoldana otyryp, jelige júktelgen sýretterdi barlyq qyrynan, ıaǵnı 360 gradýsta kórýge bolady. Jobanyń ataýyn osydan aldyq. Álemdik tehnologııa kún saıyn jańarýda, buryn 3D formatyndaǵy kórinisterdi arnaıy qurylǵynyń kómegimen ǵana kórýge bolatyn edi ǵoı, qazirgi múmkindikti ıgerip úlgerý kerek. Bizdiń 3d-Tour.kz saıtyna kirip, Jetisý ólkesindegi mýzeılerdiń qundy jádigerlerimen tanysý ońaı ári qyzyqty. Kez kelgen smartfonnan, ınternetke shyǵatyn múmkindigińiz bolsa jetkilikti, tutas tarıhty kóz aldyńyzǵa ákelemiz», deıdi joba avtory.
Qazir kúni bul joba boıynsha Muhamedjan Tynyshbaev jáne Ilııas Jansúgirov atyndaǵy mýzeılerge vırtýaldy saıahat jasaý múmkindigi bar. Muhamedjan Tynyshbaev atyndaǵy mýzeıde saqtaýly turǵan 27 454 eksponat 3D formatyna kóshirilse, Ilııas Jansúgirov atyndaǵy murajaıdyń 6 myńǵa jýyq jádigerin de ár qyrynan, túrli-tústi beınede tamashalaýǵa bolady.
Aıtpaqshy, 26 jastaǵy kásibı fotograf ári IT mamany Meıirhat Tolqynov Jetisý óńirindegi úlkendi-kishili mýzeılerdi 3D formatyna kóshirýdi armandaıdy. Ol qazir óńirlik kommýnıkasııalar qyzmetindegi jumysyn osy baǵytpen ushtastyrýda.
«Oblysta 22 mýzeı bar, barlyǵymen jumys isteýge daıynmyn. Árbir eksponat tarıhı jádiger bolǵandyqtan, adamdar úshin qoljetimdi ári sapaly bolýy kerek. Osyǵan úlesimdi qosqym keledi. Barlyq mýzeıge vırtýaldy saıahat jasap, muraǵatardy 3D formatynda jasap, VR kózildirigimen de kórýge bolatyndaı etip jasap shyǵamyn...», deıdi Meıirhat.
Qalmahanbet MUQAMETQALI,
«Egemen Qazaqstan»
Almaty oblysy
