Álem chempıonattarynyń aldynda ótkiziletin dástúrli týr 9 qyrkúıek kúni Máskeýdegi «Lýjnıkı» stadıonynda bastalǵan. Basty trofeıdi áýejaıdan kútip alǵan Almatylyqtar, artynsha osy tarıhı sáttiń qurmetine oraı qaladaǵy «Mega» ortalyǵynda bas qosty. Bul Almaty turǵyndaryna ǵana emes, búkil elimizge FIFA-nyń resmı ókilderi tarapynan jasalǵan úlken syı, qaıtalanbas estelik dep aıtýǵa bolady.
FIFA ókilderimen qatar Almatyǵa kelgen Álem jáne Eýropa chempıony, XX ǵasyrdyń Úzdik fýtbolshysy Krıstıan Karambıo bul tarıxı oqıǵanyń mańyzyn erekshe atap ótti. Sonymen qatar, tanymal fýtbolshy jyly qonaqjaılyq úshin alǵysyn bildirip, tilshilerdiń barlyq suraqtaryna jaýap bere otyryp, kýbok 9 eldi aralap úlgergenin aıta ketti. Onyń aıtýynsha, bul trofeı bizdiń elge Pákistannan kelip, óz saparyn Qyrǵyzstanda jalǵastyrmaq.
– Qazaqstan úshin bul úlken qýanysh. Biz Álem Kýbogin óz qalamyzda tamashaladyq. Áserimdi aıtyp, jetkize almaspyn. Árıne, elimizdiń qurama komandasy bul dodaǵa qatyspaıtyny ókinishti-aq. Biraq, búgin fýtboldyń jankúıerleri úshin úlken mereke. Uıymdastyrýshylarǵa osyndaı múmkindik syılaǵany úshin sheksiz alǵysymdy bildiremin, – deıdi qala turǵyny Temirlan Qýanyshev. Teńbil dop dodasynyń eń basty trofeıiniń kelýine oraı jınalǵan qonaqtardyń aıtýynsha, bul álem sportyndaǵy aýqymdy oqıǵa tek qýanyshtyń belgisi. Qonaqtarǵa alǵysyn bildirgen Almaty qalasy ákiminiń orynbasary Arman Qyryqbaev ta bul sózdi qýattap, bul elimiz úshin úlken abyroı ekenin jetkizdi.
«Osy Álem chempıonaty qarsańynda ótip jatqan aýqymdy sporttyq is-sharaǵa qatysýǵa múmkindik alǵanymyzǵa qýanyshtymyz. Álem kýbogi ol jaı ǵana júlde emes, bul álemdegi sporttyń eń ataqty dodasy. Elbasymyzdyń qoldaýymen Almaty qalasy qazir tek qana Qazaqstannyń emes, ortalyq Azııanyń da sporttyq ortalyǵy bolyp sanalady» dedi Arman Qyryqbaev.
Atalǵan joba 2006 jyldan beri álemdik fýtbol qaýymdastyǵy men Coca-cola kompanııasynyń muryndyq bolýymen iske asyp kele jatyr. Uıymdastyrýshylar Almaty ákimdigine Kýboktiń kishi nusqasyn syılap, qoldaý kórsetkenine alǵys bildirdi. Sondaı-aq sharaǵa jınalǵan barlyq qonaqtar Álem kýboginyń janynda estelik sýretke túsip máre-sáre bolyp tarqasty.
Arman OKTIаBR,
«Egemen Qazaqstan»
ALMATY
