GÚLDENSE AÝYL – GÚLDENEMIZ BÁRIMIZ!
90-shy jyldary Lenın keńsharynyń bólimshesi sanalyp kelgen Daıyndyq aýyly 11 mıllıon teńge qaryzǵa belsheden batqanda basqarýǵa eshkimniń júregi daýalamady. Turǵyndar aýyldyń bolashaǵynan kúder úzip, jan-jaqqa kete bastady. Úıler qańyrap, tútin sany 38-ge deıin quldyrady. Birjan Sháımerdenov basshylyqqa osyndaı syn sátte jerlesteriniń ótinishimen oblys ortalyǵyndaǵy qyzmeti men jaıly páterin tastap keldi. Sodan beri arada 15 jyl óte shyqty. Osy jerde bir kezderi taraýdyń az-aq aldynda qalǵan eldi meken boldy degenge sený qıyn. Daıyndyq adam tanymastaı ózgerip, úlgili aýylǵa aınaldy. Al Birjan qurǵan osy attas seriktestik Qyzyljar óńirindegi irgeli sharýashylyqtyń biri sanalady. Mashına-traktor parki túgeldeı jańaryp, sońǵy jyldary ǵana 12 «MTZ -82» traktory, 4 «Djon Dır» kombaıny, 2 sebý kesheni, keń alymdy jatka, dárishashqysh satyp alyndy. Sóıtip, ozyq agrotehnologııalar keńinen qoldanylatyn boldy. Eginshilik mádenıetin jaqsartý baǵytynda jaqsy tájirıbeler qalyptasqan. 850 gektar astyqty alqap 10 esege deıin ulǵaıyp, jyl ótken saıyn shyǵymdylyq artyp keledi. 2009 jyly gektar berekesi 34 sentnerdi qurady.
Byltyrǵy qýańshylyqtyń ózinde 17 sentnerden ónim aldy. Bıyl 39 sentnerden aınalyp, oblysta jarys kóshin bastady. Qazir Daıyndyqta 58 tútin bar. Osy jyldar ishinde Mádenıet úıin jóndeýge 5,5 mıllıon teńge jumsaldy. 7 mıllıon teńgege meshit salyndy. 2,5 mıllıon teńgege seriktestik keńsesi, 12 oryndy monsha, FAP boı kóterdi. Kitaphana qaıtadan jumys isteı bastady. Áleýmettik-mádenı nysandar jıhazdarmen, qajetti qural-jabdyqtarmen tolyqtyryldy. Byltyr Mońǵolııadan kóp balaly otbasylardy aldyryp, jumyspen, baspanamen qamtamasyz etti. Olardyń 11 balasy sabaqqa baryp júr.
Sóıtip, negizgi mektep mártebesin saqtap qaldy. 90 adam turaqty jumys isteıdi. Ortasha aılyq jalaqy 80 myń teńgeni quraıdy. Jýyrda óz kúshterimen 4 úı salyp, kóp balaly otbasylardy qonystandyrdy. Birjan Ábdilmanuly mektepke degen qamqorlyǵyn esh aıaǵan emes. Ǵımaratty kúrdeli jóndeýden ótkizip, jeńil kólik syılady. Bastaýysh synyp oqýshylary tegin tamaqtanady. 500 myń teńge bólip, shaǵyn ortalyq uıymdastyrdy. 250 myń teńge qarastyryp, órt dabylyn ornatty. Keshegi qan maıdannan oralmaǵan bozdaqtar men beıbit ómirde eńbek etip, qaıtys bolǵan 97 adamnyń aty-jónderi jazylǵan eńseli eskertkish ornatty. Onyń jany saıabaqqa aınaldyrylyp, aǵash kóshetteri egildi.
Táýelsizdiktiń on jyldyǵy qarsańynda JShS-de eńbek etetin 10 ozat jumysshyǵa 50 paıyzdyq jeńildikpen jeńil kólik áperilse, sodan bergi kezeńde ondaı qurmetke bólengenderdiń qatary 50-ge jetti. Bıyl 20 jyldyq mereıtoıdy óz sán-saltanatymen atap ótý maqsatymen qomaqty qarjy bólinip otyr. «Daıyndyq» JShS 2002 jyldan beri bankten nesıe alyp kórmepti. Istiń kózin taýyp, utymdy uıymdastyrýdyń arqasynda bereshekten tolyq qutylyp, endi eginshilikpen qatar etti mal sharýashylyǵyn da órkendetýge bet burǵan. Soǵan oraı sharýashylyqtyń 40 mıllıon teńge qarajatyna Shyǵys Qazaqstan, Qostanaı oblystarynan 230 bas qazaqtyń aqbas sıyryn ákelgen. Olardy aýksıon arqyly satyp alynǵan kanadalyq etti gereford buqalarymen shaǵylystyrmaq. Ondaǵy maqsat – etti mal basyn 400-ge deıin jetkizip, asyl tuqymdy repredýktor sharýashylyq mártebesin ıelený. Munda qunarly jem-shóp qoryn jasaý isi de muqııat eskerilgen. 300 gektar jerge kópjyldyq shóp egiledi.
Mal sharýashylyǵy úshin Qytaıdan júk tıegish, AQSh-tan orama shóp taılaǵysh jetkizilgen. Fransııaǵa «Manıtý» atty ondaǵan operasııany bir ózi atqaratyn tehnıkaǵa tapsyrys berip qoıypty. Birjan atbegilikpen de aınalysady. Seriktestiktegi arǵymaqtardyń deni – aǵylshyndyq tuqymdar. Aıman atty jelmen jarysqan sáıgúlik talaı báıgelerde top jaryp, 11 jeńil kólik pen 3 mıllıon teńge utyp alǵan. Mine, qaladaǵy jyly ornyn aýylǵa aýystyrǵan ol bir kezderdegi qıyndyqtardy eńserip, búginde el azamatyna laıyq óz ornyn tapqan.
Materıaldardy uıymdastyrǵan «Egemen Qazaqstan» gazetiniń Soltústik Qazaqstan oblysyndaǵy menshikti tilshisi О́mir ESQALI.
