Ulttyq Bank Tóraǵasy Danııar Aqyshev Memleket basshysynyń qatysýymen ótken Úkimettiń otyrysynda Bank sektorynyń qarjylyq ornyqtylyǵyn arttyrý baǵdarlamasynyń negizgi baǵyttary týraly aıtyp berdi.
Baǵdarlamanyń birinshi baǵyty.
"Úkimetpen birge ótken jyly BTA Bankpen biriktirilgennen keıin kóp problemalarǵa ushyraǵan júıe quraýshy bank - Kazkommersbank tolyǵymen qalypqa keltirildi. Nátıjesinde BTABankke berilgen kredıtti Problemalyq kredıtter qory satyp aldy, al Kazkommersbanktiń ózi qaıta kapıtaldandyrý boıynsha mindettemelerge aıyrbastalyp, strategııalyq ınvestorǵa satyldy. Memlekettik qoldaý arqasynda halyqtyń depozıtteri, 4,5 trıllıon teńge somadaǵy memlekettik jáne jeke kompanııalardyń qarajaty saqtaldy", - dedi Aqyshev.
Baǵdarlamanyń ekinshi baǵyty.
«Áleýmettik mańyzdy jáne naryqqa birshama úlesi bar iri bankterdi qoldaý. Ulttyq Bank barlyq bank júıesi aktıvteriniń 28 paıyzyn quraıtyn 5 banktiń qatysýyn maquldady. Olarǵa halyqtyń 2 trıllıon teńgeden astam depozıtteri jáne kvazımemlekettik kompanııalardyń 2,2 trıllıon teńge depozıtteri men shottary ornalastyrylǵan.Baǵdarlamanyń sheńberinde bankterdi ústeme kapıtaldandyrýǵa memleket pen aksıonerlerdiń ortaq qatysý shemasy iske asyryldy. Memlekettik qoldaý 653 mıllıard teńge boldy. Atalǵan bankterdiń aksıonerleri 421 mıllıard teńgege bankterdi ústeme kapıtaldandyrý boıynsha jáne nashar kredıtterdi 1,2 trıllıon teńgeden astam somaǵa tómendetýge mindetteme qabyldady. 665 mıllıard teńge esepten shyǵaryldy», - dep aıtyp berdi qarjy retteýshisiniń basshysy.
Aqyshevtyń aıtýy boıynsha, baǵdarlama is júzinde bankterdiń ornyqtylyǵyn arttyrdy jáne ekonomıkany kredıtteýdi keńeıtýge aıtarlyqtaı áser etti. Ekonomıkaǵa Kazkommersbankti qosa alǵanda, ústeme kapıtaldandyrý alǵan bankterge jańa qaryzdar berý 781 mıllıard teńge boldy. "Alaıda, qoldaý kórsetý baǵdarlamalary eldegi qarjylyq turaqtylyq úshin máni bar iri ınstıtýttardy ǵana qamtýǵa tıis ekendigin halyqaralyq tájirıbe rastap otyr. Onyń ústine, memleketten jeńildetilgen resýrstar usyný opsııasy qarjy ınstıtýttarynyń aksıonerleri arasynda masyldyq kóńil-kúıdi damytýǵa jol bermeý maqsatynda tek qysqa merzimdi sıpatta bolýǵa tıis", - dedi Aqyshev.
Ol memlekettiń turaqty qoldaý jelisi barlyq bank úshin olardyń bank júıesindegi róli men mólsherine qaramastan memleketten arzan aqsha alýyn yntalandyratynyn aıtyp berdi: "Biz ahýaly jalpy qarjy turaqtylyǵyna eshqandaı qaýip tóndirmeıtin shaǵyn bankter baǵdarlamaǵa qatysatynyna senip otyrǵanyn kórip otyrmyz. Sondyqtan Ulttyq Bank Basqarmasy 2018 jylǵy 6 aqpanda Baǵdarlamany iri bankterdi ústeme kapıtaldandyrý boıynsha sharalar bóliginde iske asyrýdy aıaqtaýǵa sheshim qabyldady. 2018 jylǵy 7 aqpannan bastap bankterdiń ótinimderin qaraý toqtatyldy, al osy merzimge deıin kelip túsken ótinimder qaralmaıdy".
Baǵdarlamanyń úshinshi baǵyty.
"Bankterdi qoldaýdyń daǵdarysqa qarsy sharalaryn iske asyrǵannan keıin sektordy ornyqty damytý sharalaryna kóshemiz. Birinshi kezekte, bul bolashaqta kredıtteý kezinde qarajatty maqsatsyz paıdalaný problemalaryna jol bermeý. Bankter tarapynan asa saqtyqpen saıasat júrgizý. Biz retteýshi provızııalar tetigin qalypqa keltirdik. Bankterdiń jańa № 9 qarjylyq eseptilik standartyna beıimdelýi boıynsha jumys júrgizýdemiz. Ekinshiden, Ulttyq Banktiń qadaǵalaý mandatyn kúsheıtý. Táýekeli joǵary saıasat júrgizetin bankke qatysty retteýshiniń aldyn ala yqpal etetin múmkindikteri bolýǵa tıis. Bul táýekelge baǵdarlanǵan qadaǵalaý dep atalady. Ol bank sektorynda osyndaı problemalardyń qaıtalanýyna jol bermeýge múmkindik beredi. Qarjylyq qyzmetterdi tutynýshylardyń múddesin qorǵaýdy kúsheıtedi", - dedi Aqyshev.
Ol bail-in tetigin zańnamalyq bekitý arqyly banktiń táýekelderin onyń iri kredıtorlary arasynda bólý kózdeletindikten, budan memleketke de paıda keletini týraly atap ótti. Ol úshin Úkimetke engizilgen Ulttyq Bank týraly zańǵa jáne salalyq zańnamaǵa túzetýlerdi jyldam qabyldaý qajet. Aqyshev Qazaqstan Respýblıkasy Úkimeti men Parlamentine túzetýlerdi jyldam qaraýdy qoldaý týraly ótinish bildirdi.
