TASS aqparat agenttiginiń habarlaýynsha, jer silkinisiniń oshaǵy Hýalıan aımaǵynda bolǵan. Taıvan seısmologtary onyń magnıtýdasy 6 baldan asqanyn habarlady. Derekterge súıensek, elde bir kún ishinde jer 180 márte terbelgen.
Apattyń saldarynan jaǵalaýdaǵy birqatar ǵımaratqa zaqym kelgen. Tipti keıbir keshender qısaıyp, qulaýdyń aldynda tur. Qutqarýshylar izdeý jumystaryn jalǵastyryp jatyr. BBC arnasy joǵalǵan adamdardyń basym bóligi sol qıraǵan úıindilerdiń astynda qalýy múmkin ekenin aıtady.
Oqıǵadan keıin Qytaı sekildi kórshi elder kómek qolyn sozǵan. Taıvan tarapy solardyń ishinen Qytaıdyń járdeminen bas tartyp, qutqarý sharalaryna ózderiniń shamasy jetetinin málimdedi. Degenmen resmı ókilder bul sheshimnen eshqandaı saıası astar izdemeý kerek ekenin jetkizdi. Jalpy Qytaı men Taıvan arasyndaǵy qarym-qatynas 1949 jyly buzylǵan bolatyn. Keıinirek ózara mámilege kelgendeı kóringenimen, ishinara bir-birin moıyndamaıtyny baıqalady.
Taıvan – eki tektonıkalyq taqtanyń qıylysqan jerinde ornalasqan. Sondyqtan munda jer silkinisi jıi bolyp turady. Eki jyl buryn magnıtýdasy 6,4 baldyq apat kelip, 117 adamnyń ómirin jalmaǵan-dy. Al 1999 jylǵy jer silkinisi kezinde 2400-ge jýyq adam qaıtys bolǵan.
