Bolashaq nysannyń kólemi ájeptáýir. Alańy 57 sharshy metr, týtuǵyr bıiktigi 91 m. 112 sharshy metr jańa alańǵa ornatylǵan 91 metr bıiktiktegi memlekettik tý oblys ortalyǵynyń kez kelgen núktesinen anyq kórinetin bolady. Jobada qurylystyń eki jaǵynda ornalasatyn eki sýburqaq qarastyrylǵan. Týtuǵyr qaladaǵy eń bıik qurylys bolady.
Nurlan Noǵaev 2018 jyly Isataı-Mahambet alańyn qaıta jańǵyrý bastalatynyn da aıtty.
Jobalaý-smetalyq qujattamaǵa sáıkes belgilengen aýmaqqa eki kólemdi sáýlet kompozısııasy, úlken jáne kishi sýburqaqtar, basseın, oryndyqtary bar pergolalar ornatylady. Alańnyń basty áshekeıi kóbikti sýburqaq qondyrylǵan basseıni bar mármár dombyra túrindegi sáýlet kompozısııasy bolady dep josparlanyp otyr.
Qalpyna keltirý jumystary aıaqtalǵannan keıin Atyraý qalasynyń basty alańy jaryqtana, jasyldana túsedi – aýmaqta gúlzarlar, jasyl shópti kógaldar, kóptegen jasyl jelekter bolady. Qala turǵyndary men qonaqtary tórt sándik shatyr astynda demala alady.
Eki joba da jer qoınaýyn paıdalanýshylardyń áleýmettik aýdarymdary esebinen qarjylandyrylady.
- Memleket basshysynyń tapsyrmasyna sáıkes Jangeldın men Qulmanov kósheleriniń qıylysyndaǵy paıdalanylmaǵan jerdi qaıtardyq. Munda Qazaqstannyń táýelsizdik jyldaryndaǵy jetistikterin aıshyqtaıtyn týtuǵyry bar jańa alań salynady, - dedi Nurlan Noǵaev. -Alańdy qalpyna keltirý óz kezeginde munaıly astananyń kelbetine kórik qosyp, Atyraýdyń barlyq kórkemdigin kórsetedi.
Baqytgúl BABASh,
"Egemen Qazaqstan"
