Úkimettiń qaýlysymen 80 jyldyq tarıhy bar Mahambet atyndaǵy qazaq drama teatryna «akademııalyq» mártebe berildi. Osy joǵary dárejeli mártebeni Mádenıet jáne sport mınıstri Arystanbek Muhamedıuly Atyraý oblysyna sapary barysynda óńirdegi mádenıet jáne sport salasy qyzmetkerlerimen kezdesýi kezinde saltanatty túrde tabys etti.
Vedomstva basshysy Atyraý oblysy mádenıet, óner jáne sport salasynda aldyńǵy qatarda kele jatqan oblystardyń biri ekendigine toqtaldy.
– «Akademııalyq» mártebesi óz salasynda jetekshi bolyp tabylatyn, Qazaqstan Respýblıkasynyń ulttyq mádenıeti men ónerin qalyptastyrýǵa, damytýǵa jáne nasıhattaýǵa eleýli úles qosqan memlekettik mádenıet uıymdaryna, jekelegen kásibı kórkem jáne shyǵarmashylyq ujymdarǵa beriledi. Bul mártebe – eń joǵarǵy marapat bolyp tabylady, – degen mınıstr «Oblystyq Mahambet atyndaǵy qazaq drama teatry» kommýnaldyq memlekettik qazynalyq kásipornyna «Akademııalyq» mártebe berý týraly Premer-Mınıstrdiń arnaıy qaýlysyn oqyp berdi.
Jańa mártebeni berý týraly resmı qujatty oblys ákimi Nurlan Noǵaev pen teatr basshysy Berek Djamenovke mınıstr Arystanbek Muhamedıuly jáne Alashtyń abyzy atanǵan KSRO Halyq ártisi, Memlekettik syılyqtyń ıegeri, Qazaqstannyń Eńbek eri Asanáli Áshimov saltanatty túrde usyndy.
– Osy zor mártebeni qabyldaı otyryp, joǵary dárejeli ataqqa laıyq bolýǵa ant etemiz, – dedi teatrdyń dırektory Berik Kelekeshuly.
– Endi Mahambet atyndaǵy qazaq drama teatrynyń dárejesi Muhtar Áýezov atyndaǵy teatrmen teńdesti. Bul qýanyshty keshe ǵana aramyzdan ótken jazýshy Raqymjan kórse, júregi jarylyp qýanar edi, – dedi Halyq ártisi Asanáli Áshimov óz kezeginde.
