Oblystaǵy Isataı, Qurmanǵazy, Jyloı aýdandarynyń turǵyndary men munaı óndirý kásiporyndary aýyz sý men tehnologııalyq jáne tehnıkalyq qajettilikterine qajet sýdy «Astrahan-Mańǵyshlaq» magıstraldy sý qubyrynan alady. Osy qubyr Mańǵystaý oblysyndaǵy tutynýshylardy da aýyz sýmen qamtamasyz etedi.
Eldi mekenderdegi turǵyndar sanynyń ósýi, óndiristiń ulǵaıýy jaqyn bolashaqta sý tapshylyǵyn arttyra bereri sózsiz. Qazirdiń ózinde Isataı, Jylyoı aýdandary jáne Qulsary qalasynyń turǵyndary men mekeme-kásiporyndary sý tapshylyǵyn sezinip otyr, olarǵa keıde sý saǵattap qana beriledi.
Osy máseleni eskerip, qazirgi kezde 30 jyl buryn salynǵan sý qubyryn jańǵyrtý jumysyn qolǵa alý qajet. «QazTransoıl» aksıonerlik qoǵamynyń baǵalaýy boıynsha jobanyń quny 102 mıllıard teńgeni quraıdy. Bul sý qubyry qazir óziniń tehnıkalyq múmkindikteriniń sheginde jumys istep otyr.
Sonymen qatar Atyraý oblysymen shekaralas Aqtóbe oblysyndaǵy Muǵaljar aýdanynda «Kókjıde» jerasty tushy sý orny bar. Bul elimizdiń batys aımaǵyndaǵy iri sý kenishi bolyp tabylady. Úkimettiń 2016 jylǵy 18 qazandaǵy tapsyrmasyna sáıkes Aqtóbe oblysynyń ákimdigi «Kókjıde» jerasty kenishindegi sýdy paıdalaný qoryn qaıta baǵalaý úshin Jobalaý-smetalyq qujattary ázirlengen bolatyn. Jobanyń smetalyq quny 1,2 mlrd teńgeni qurady.
Biz Premer-Mınıstr Baqytjan Saǵyntaevtyń atyna depýtattyq saýal joldap, Atyraý jáne Aqtóbe oblystarynyń turǵyndaryn sapaly aýyz sýmen qamtamasyz etý úshin «Kókjıde» kenishin paıdalaný maqsatynda sý qoryn qaıta baǵalaý jónindegi zertteý jumystaryn júrgizý jáne sý kenishiniń balanstyq kontýryn anyqtaý úshin respýblıkalyq bıýdjetti naqtylaý kezinde osy qarajatty bólý múmkindigin qarastyrýdy ótindik.
Ǵumar DÚISEMBAEV,
Senat depýtaty
