Jıyn barysynda elshi Sırııadaǵy is-qımyldar jóninde áńgimelep, eldegi máseleni sheshýdegi Astana prosesiniń mańyzyn atap kórsetti. Eń áýeli N.Ýıanyk Afrındegi áskerı operasııanyń maqsatyn túsindirip ótti.
«Túrkııa qarýly kúshteri shekaralyq aımaqtarda qaýipsizdik pen turaqtylyqty qamtamasyz etý maqsatynda Sırııanyń soltústik-batysynda ornalasqan Afrın aımaǵynda «Záıtún butaǵy» áskerı operasııasyn bastady. Onyń maqsaty – DAISh (ILIM), YPG, PYD sekildi birqatar terrorıstik toptarǵa tosqaýyl qoıyp, dostas ári baýyrlas eldiń halqyn sodyrlardyń qysymynan qutqarý. Osy operasııa BUU jarǵysynyń 51-babyna saı «О́zin-ózi qorǵaý quqyǵy» sheńberinde jáne Qaýipsizdik Keńesiniń terrorızmmen kúreske qatysty qararlaryna saı júrgizildi», dedi N.Ýıanyk.
Elshiniń sózine qaraǵanda, osy is-qımyldardan keıin áleýmettik jeliler men buqaralyq aqparat quraldarynda Afrındegi jaǵdaıǵa qatysty jalǵan aqparattar qaptap ketken. Osyǵan baılanysty elshilik tarapy máseleniń mán-jaıyn ashyp túsindirýdi jón dep taýypty.
Dıplomat Sırııa daǵdarysy bastalǵannan beri Túrkııanyń ustanymynan aınymaı, elge kómek qolyn sozyp kele jatqanyn atap ótti. Qazirgi tańda eldegi jaǵdaıy retteý úshin Jeneva kelissózderine, Astana prosesine kepil-memleket retinde qatysyp otyrǵanyna da toqtaldy. Sırııadan bosqan 3,5 mıllıon halyq Túrkııada bas saýǵalap júrgenin de sóz etti. Elshiniń aıtýynsha, «Záıtún butaǵy» operasııasy kezinde beıbit turǵyndar men dinı oryndar, mádenı nysandar, tarıhı jáne arheologııalyq eskertkishterge zaqym keltirmeý úshin saqtyq sharalary qarastyrylǵan.
«Operasııa bastalǵannan beri Túrkııa áýe kúshteri terrorıstik uıymdarǵa tıesili 782 nysan joıylǵan. Budan bólek eki myńnan astam lańkestiń kózi qurtyldy. Qaqtyǵys barysynda qarýly kúshterimizdiń 32 sarbazy mert bolyp, 183 jaýyngeri jaralandy. Is-qımyldar kezinde halyqaralyq qoǵamdastyq tyıym salǵan oq-dáriler qoldanylmaıdy. Mundaı qarýlar Túrkııa arsenalynda joq», degen elshi «Záıtún butaǵy» operasııasynyń mańyzyn túsindirdi.
N.Ýıanyk Afrındegi áskerı is-qımyldardan keıin áleýmettik jeliler men BAQ-ta jalǵan aqparattyń tez tarap jatqanyna qynjylys bildirdi. Osyǵan qatysty elshilik tarapy arnaıy prezentasııa ázirlegen eken. Brıfıngte bul málimetter de jýrnalısterge kórsetildi. Elshiniń sózine saı, terrorıstik uıymdardyń ókilderi áleýmettik jelini belsendi qoldanyp, jalǵan jańalyqtardy jıi-jıi jarııalaıdy.
Osy oraıda, elshi Sırııadaǵy daǵdarysty retteýdegi Astana prosesiniń nátıjelerin erekshe atap kórsetti. Onyń pikirinshe, janjaldasqan taraptar tuńǵysh ret Astanada kelissózderi kezinde bir ústel basyna jınalýy – Qazaqstannyń bastamalarynyń mańyzdylyǵyn kórsetedi. Sırııada deeskalasııa aımaqtaryn qurý jónindegi sheshim de eldegi ahýaldy qalpyna keltirýge aıtarlyqtaı úles qosatynyna da senim bildirdi. Sondaı-aq N.Ýıanyk kepil memleketterdiń syrtqy ister mınıstrleriniń kezdesý aldaǵy naýryzda Astanada ótýi múmkin ekenin jetkizdi.
Budan bólek, N.Ýıanyk Túrkııada demalys maýsymy kezinde týrısterge qatań tekserý júrgizilmeıtinin habarlady. Onyń aıtýynsha, keıingi eki jylda el aýmaǵynda eshqandaı terrorıstik shabýyl bolǵan joq.
«Túrkııa týrıster úshin eń qaýipsiz aımaq sanalady. Qazirgi tańda terrorızmmen kúres shekaralyq aımaqtarda ǵana emes, búkil elde júrgizilip jatyr. Sondyqtan jaǵdaı turaqty ekenine bás tige alamyn. Qazaqstandyq týrısterdi elimizge qonaqqa kelýge shaqyramyz», dedi N.Ýıanyk.
Abaı ASANKELDIULY,
«Egemen Qazaqstan»
