Jeńildetilgen ósimmen aýyl turǵyndaryna beriletin nesıeni alatyndar sany 14 myńǵa jetetini, stýdentterge arnalǵan jataqhanalar salynatyny, qosymsha granttar beriletini jáne t.b. halyqty Naýryz merekesiniń aldynda úlken qýanyshqa bólegeni sózsiz. Sonymen qatar Qaraózek (Qyzylorda oblysy) – Jezqazǵan – Qaraǵandy – Temirtaý – Astana baǵytymen gaz qubyryn tartý týraly tapsyrma bergeni de qýanyshty habar boldy. Bul myńdaǵan jańa jumys oryndary ashylyp, halyqtyń ál-qýaty artady degen sóz. Sonymen qatar elordanyń ekologııasy jaqsaryp, taza otyndy paıdalanýǵa múmkindik beredi. Kópten beri Astana turǵyny bolyp kele jatqan bizder de elorda aspanyna qysty kúnderi zııandy qaldyqtardyń shyǵyp, aýyr ıistiń tarap jatatynyn kórip júrmiz. Sondyqtan turǵyndar osy máseleni jıi kóteretin edi. Endi sol másele sheshilip, jylyna 35 myń tonnadaı zııandy qaldyqtar taramaıtyn boldy. Elbasy bul joba keminde 2,7 mln adamdy ekologııalyq taza otynmen qamtamasyz etýge múmkindik beredi dedi. Osynyń ózi úlken jetistik, tolaǵaı tabys qoı. Sonymen qatar bul másele kóp degende 1-1,5 jyldyń ishinde sheshiletin boldy. Barlyq elordalyqtar bul jańalyqty qýanyshpen qarsy alǵany daýsyz.
Sonymen birge Prezıdenttiń eńbekaqysy tómen adamdar úshin salyqtyq júktemeni 1 paıyzǵa deıin tómendetý týraly tapsyrmasy da óte qýanyshty jańalyq boldy. Shynynda az tabystan alynǵan kóp salyqtan bıýdjettiń búıiri shyqpaıdy, esesine az da bolsa eńbekaqy ıelerine paıda keltirip, jaǵdaıyn jaqsartýyna járdem beredi. Munyń ózi eńbekaqynyń naqty kóbeıýine járdem jasaıtyn paıdaly sheshim bolǵaly tur. Osynyń arqasynda 2 mıllıondaı adam eńbekaqysyn arttyra alady eken. Qoryta aıtqanda, búgingi Úndeý halyqty aıryqsha qýanyshqa bólegen umytylmas jańalyq boldy.
Bekmyrza ELAMANOV,
Senat depýtaty
