Solardyń ishinde eń bastysy – «Árbir otbasyna baspana alýdyń jańa múmkindikterin berý» bastamasy ekendigi daýsyz. Elimizde turǵyn úı salý qarqyny jyldan-jylǵa údetilip, ótken jyly 11,2 mıllıon sharshy metrdi quraǵan rekordtyq kórsetkishke qol jetkizilgenimen, halqymyzdyń demografııalyq ósimi de aıtarlyqtaı bolǵandyqtan, baspana kezeginde turǵandar sany áli de kóp. Osyǵan oraı Prezıdent «7 – 20 – 25» baǵdarlamasyn usynyp otyr. Iаǵnı turǵyn úı nemese páter satyp alýshylarǵa ıpotekalyq nesıe jyldyq mólsherlemesi 7 prosentten, bastapqy jarnasy 20 prosentten asyrylmaı 25 jylǵa beriletin bolady. Elbasy usynǵan jańa baǵdarlama baspanadan muqtajdyq kórip júrgen mıllıondaǵan azamattarǵa eleýli jeńildik týǵyzary haq.
Ekinshi bastama – «Jalaqysy tómen jumysshylardyń eńbekaqysyn kóbeıtý úshin olardyń salyq júktemesin azaıtýdyń» da áleýmettik mańyzy zor. Jalaqysy tómen adamdarǵa salynatyn tabys salyǵynyń mólsherin kelesi jyldan bastap, 10 prosentten 1 prosentke deıin azaıtý 2 mıllıonnan astam adamnyń jaǵdaıyn jaqsartpaq.
Elbasynyń úshinshi bastamasy – «Joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý» da qoǵamymyzda da, Parlamentte de jıi kóterilip júrgen problemalardy ońynan sheshýge baǵyttalǵan.
Tórtinshi bastama – «Shaǵyn nesıe berýdi kóbeıtý» qajettigi týraly biz óńirlerde bolyp, ásirese, aýyl turǵyndarymen kezdesýler ótkizgende únemi estip júrmiz. Sondyqtan da ústimizdegi jyly osy maqsatqa qosymsha 20 mıllıard teńge bólinip, shaǵyn nesıe alatyndardyń sany 14 myń adamǵa jetetindigi – Elbasynyń, eń aldymen, aýylǵa degen aıryqsha qamqorlyǵy dep sanaımyn.
Besinshi bastama – «Eldi gazben qamtamasyz etýdi jalǵastyrý» da – bizge, depýtattarǵa, elimizdiń ortalyq jáne soltústik óńirleriniń turǵyndarymen kezdesken saıyn aıtylyp, kún tártibinen túspeı turǵan mańyzdy másele.
Elbasynyń jańa áleýmettik bastamalary barsha qazaqstandyqtardyń erteńgi kúnge senimderin nyǵaıtyp, qanattandyra túsetin qýatty qamqorlyq dep bilemin.
Káribaı MUSYRMAN,
Májilis depýtaty
