Janna Qýantaıqyzy buǵan deıin Aqtóbe notarıaldyq okrýgi quramynda jeke notarıýs qyzmetin atqaryp kelipti. Sol ýaqytta «Bolashaq Invest» JShS ǵımaratynan ózine qajetti keńseni jalǵa alyp eńbek etken. Menshik ıelerimen kelisilgen aı saıynǵy 35 myń teńge jaldaý aqysyn belgilengen ýaqytynda tólep turypty. Áıtse de 2016 jyldyń 10 qazany kúni oǵan atalǵan seriktestik ókilinen ǵımarat satylady, sondyqtan keńseni bosatyńyz degen jazbasha hat túsedi. Ol bul talapty oryndaıdy. Degenmen jalgerlik aqy jáne quny 35 myń teńge turatyn órtke qarsy dabyl kóteretin qondyrǵyny óz qarajaty esebinen tólep ornatqany úshin 70 myń teńgeni qaıtaryp berýin suraıdy. Alaıda «Bolashaq Invest» JShS-niń ókili Janna Esmurzaevanyń talabyn oryndamaıdy. Olardy sotqa berýge tolyq moraldyq quqym bar edi. Alaıda mundaı áreketke barmadym. Eń qynjylarlyǵy, osy seriktestik maǵan qaryzdar bola tura, meniń ústimnen sotqa negizsiz talap-aryz joldapty. Sonyń negizinde 26 kúnge ósimi men aıybyn qosa eseptegende 42 585 teńge óndirý jóninde sot uıǵarymy shyqty. Ony 2016 jyldyń 1-26 qazany aralyǵynda tólettirýdi suraǵan. Bir qyzyǵy, tipti qyzyǵy emes-aý shyjyǵy, bul kezde «Bolashaq Invest» JShS atalǵan jyljymaıtyn nysandy satyp úlgergen-di. Osy derektiń ózi olardyń sotqa joldaǵan talap-aryzdarynyń shyndyqqa janaspaıtynyn kórsetedi. Tipti aı saıynǵy tıesili jalgerlik aqyny tólegeni jónindegi bank kvıtansııalary qolymda tur emes pe, deıdi ol.
«Bolashaq Investtiń» qandaı qıturqy áreketke barǵanyn op-ońaı dáleldep bere alamyn. Sonyń bir mysaly – №91 eskertý hat. Olar habarlandyrý qaǵaz sekildi qyzmettik qujattarda kórsetilgen datalardy, aılar men kúnderdi burmalap kórsetken. Keıinnen belgili bolǵanyndaı, osy burmalanǵan qujattar sotqa joldanǵan. Bul jóninde meniń qolymda bultartpaıtyn derekter bar, deı kele sol sátte Janna Qýantaıqyzy sonyń bárin qolymyzǵa ustatty.
«Bolashaq Invest» meni ǵana sazǵa otyrǵyzýmen shektelmeı, ózge de azamattardy ári sot organdaryn da aldaýdyń retin tapty degen oıdamyn. Sóıtip men burmalanǵan qujattyń qurbany bolyp otyrmyn. Osy janaıqaıymdy sýdıalarǵa da aıttym. Qujattarda olardyń aılar men kúnderdi qalaı aýystyryp kórsetkeni taıǵa tańba basqandaı aıqyn kórinip tur. Soǵan qaramastan bul dálelder eskerilmedi, dep kúıinedi Janna Qýantaıqyzy.
Álbette, Aqtóbe oblystyq soty apellıasııalyq alqasynyń sheshimi bar. Biraq sottyń sońǵy satysynda azamatsha Janna Esmurzaevanyń atyna óndirildi dep sheshilgen aıyp somasy tipti aıtýǵa da turmaıtyndaı, múldem az ekenin de aıta ketken jón.
Temir QUSAIYN,
«Egemen Qazaqstan»
AQTО́BE
