Foto: Erlan OMAR, «Egemen Qazaqstan»
Jıyn Elbasynyń «Prezıdenttiń bes áleýmettik bastamasy» atty halyqqa Úndeýin qoldaý maqsatynda uıymdastyryldy.
Is-sharaǵa tóraǵalyq etken «Nur Otan» partııasy Tóraǵasynyń birinshi orynbasary Máýlen Áshimbaev bul Úndeý Qazaqstannyń áleýmettik jańǵyrýyndaǵy bes basym baǵytty aıqyndap bergen biregeı baǵdarlamalyq qujat ekenin aıtty. Sondaı-aq Elbasy usynystary halqymyzdyń áleýmettik jaǵdaıyn jaqsartýǵa aıryqsha áserin tıgizetinin atap kórsetti.
«Búkil álem boıynsha memlekettik áleýmettik baǵdarlamalar keıinge shegerilip, úkimetter burynǵy mindetterinen bas tartyp jatqan aýmaly-tókpeli shaqta Memleket basshysy osyndaı batyl bastamalardy qolǵa alyp otyr. Osylaısha Elbasy kezekti ret Qazaqstan úshin halqynyń áleýmettik jaǵdaıy árdaıym basym baǵyt bolyp sanalatynyn is júzinde dáleldep berdi», dedi partııa Tóraǵasynyń birinshi orynbasary.
Sondaı-aq M.Áshimbaev qazirgi tańda halyqtyń eń basty áleýmettik máselesi baspana ekenine toqtalyp, muny sheshý úshin atqarylyp jatqan jumystardy mysalǵa aldy. Máselen byltyr rekordtyq deńgeıde 11 mıllıon sharshy metrden astam turǵyn úı salynǵan. Áıtse de partııa Tóraǵasynyń orynbasary áli kúnge deıin kóptegen qazaqstandyqtyń páterge muqtaj ekenin aıtyp ótti. Sondyqtan da Prezıdenttiń bastamalaryn jurtshylyq qýana qabyldaýda.
Partııa Tóraǵasynyń orynbasary Úndeýde baspana máselesi, jalaqysy tómen azamattardyń salyq júktemesin azaıtý, joǵary bilimniń qoljetimdiligi men sapasyn arttyrý, stýdent jastardy jataqhanamen barynsha qamtamasyz etý, shaǵyn nesıe kólemin ulǵaıtý, birneshe qalaǵa gaz tartý máseleleri usynylyp qana qoımaı, olardy iske asyrý tetikteri de naqty kórsetilgenine nazar aýdardy.
«Prezıdenttiń barlyq bastamasy jan-jaqty saraptalyp, zerdelengenin jáne olardy júzege asyrýǵa naqty qarjylaı negiz bar ekenin atap ótken jón. Sonyń arqasynda qazaqstandyqtar Elbasy tapsyrmalaryn júzege asyrýdyń nátıjelerin taıaý jyldary sezine alady. Memleket basshysy bul mańyzdy bastamalardyń júzege asyrylýyn baqylaýdy «Nur Otan» partııasyna júktedi. Osyǵan oraı Elbasy tapsyrmasy partııa jumysynyń aldaǵy ýaqyttaǵy negizgi mindeti bolady», dedi M.Áshimbaev.
Budan keıin sóz alǵan «Aq jol» partııasynyń tóraǵasy, Májilis depýtaty Azat Perýashev «Prezıdenttiń bes áleýmettik bastamasynda» eń basty nazarda qarapaıym turǵyndardyń múddesi turǵanyn atap kórsetti. Iаǵnı osy baǵdarlama halyqtyń turmysyn jaqsartyp, olarǵa qajetti, ózekti máselelerdiń tıimdi sheshimin tabýdy maqsat etedi. A.Perýashev «Aq jol» partııasy men onyń depýtattyq fraksııasy da Úndeýdi qoldap, ondaǵy mindetterdi iske asyrýǵa óz úlesin qosýǵa ázir ekenin málimdedi.
«Myna nársege nazar aýdarǵym kelip otyr. Shaǵyn nesıeleý kólemin arttyrý, paıyzdyq jáne salyqtyq jeńildik arqyly kásipkerlikti kótermeleýge talpyný qurylys salasyn damytyp, jańa jumys oryndaryn ashýǵa kómektesedi. Iаǵnı osynyń barlyǵy túptep kelgende qarapaıym halyqqa paıdaly bolmaq. Munyń taǵy bir mysalyn tabysy tómenderge salynatyn salyqtyń mólsherin on esege azaıtý jónindegi sheshimnen de baıqaýǵa bolady», dedi «Aq jol» partııasynyń tóraǵasy.
Qazaqstannyń kommýnıstik halyqtyq partııasynyń hatshysy, Májilis depýtaty Jambyl Ahmetbekov Memleket basshysynyń bastamalary árdaıym naqty ári el ekonomıkasynyń múmkindigine saı esepteletinin aıtty. Sonymen qatar Elbasynyń birer kún burynǵy Úndeýinde kóterilgen baspana, jalaqy máseleleri, sol sııaqty bilim berý men onyń sapasyn arttyrý Qazaqstannyń kommýnıstik halyqtyq partııasy ustanymymen sáıkes keletinin jetkizdi.
«Aýyl» halyqtyq-demokratııalyq patrıottyq partııasynyń tóraǵasy, senator Álı Bektaev Memleket basshysynyń Úndeýin tarıhı oqıǵaǵa balady. Senator áleýmettik bastamalar aýyl turǵyndaryna tikeleı qatysty bolǵandyqtan, Elbasynyń Úndeýin «Aýyl» partııasy da qoldaıtynyn málimdedi.
Budan soń Demokratııalyq kúshterdiń «Qazaqstan-2050» jalpyulttyq koalısııasy músheleri, eldegi jetekshi partııalar basshylary, Parlament depýtattary sóz alyp, «Prezıdenttiń bes áleýmettik bastamasyna» baılanysty óz oılaryn ortaǵa salyp, pikirlerimen bólisti.
Is-shara sońynda elimizdiń barsha azamattaryn Qazaqstannyń áleýmettik jańǵyrýy jolyndaǵy batyl qadam dep baǵalanǵan qujatqa qoldaý bildirýge, ondaǵy bastamalardy júzege asyrý jumystaryna belsendi qatysýǵa shaqyrǵan úndeý qabyldandy.
Abaı ASANKELDIULY,
«Egemen Qazaqstan»
