9 naýryz ben 1 sáýir aralyǵynda qoıylatyn sırk spektakli «Er Tóstik» ertegisiniń jelisine negizdelgen. Ejelgi qazaq ertegisi boıynsha órbıtin 11 oqıǵa ilki dáýirlerdegi etnıkalyq mádenıet pen búgingi zamanaýı ýaqyt aıshyqtaryn úılestirgen. Ondaǵy qoıylymǵa arnaıy mýzyka jazylyp, elimizdiń mańdaıaldy kompozıtorlarynyń shyǵarmalary qoldanylǵan. Ulttyq naqyshtaǵy qoıylymdy astanalyqtardyń nazaryna 60 ónerpaz alyp shyqpaq. Jarty ǵasyrǵa jýyq baı tarıhy bar óner ujymyn elordaǵa sırk dırektory Baqyt Bókebaev bastap kelgen.
Sırk dırektory B.Bókebaevtyń aıtýynsha, ártister osynaý erekshe kórsetilimdi fantastıkalyq áserli lazerlik jarqyl-jurqyldarmen, kásibı sahnalyq jaryq pen dybystardyń súıemeldeýimen, LED ekrandaǵy transformasııalyq beınelermen sahnalamaq.
Baǵdarlama úshin sırk janry boıynsha arnaıy ssenarıı jazylyp, jańa tańǵajaıyp nómirler men bas aınaldyrarlyq trıýkter qoıylady dep kútilýde. Eki júzden astam dızaınerlik kostıýmder tigilip, erekshe rekvızıtter men sahnalyq tehnologııalar qoldanylǵan.
Jalpy, Qazaq memlekettik sırkiniń bul «Skıfııa» baǵdarlamasyn qoıýdaǵy basty maqsat – kásibı otandyq sırk ónerin barshaǵa nasıhattaı otyryp, Uly Dalanyń dástúrli mádenıetiniń sarqytyn, saıypqyran babalarymyzdyń bekzat ónerin ult sanasynda qaıta jańǵyrtý. Qazaq óneriniń qara shańyraǵy tanymymyzdaǵy tarıhty qaıta túletý arqyly qyzǵaldaq qyzdardyń órnekti ónerin, júrek jutqan jigitterdiń otty jigerin shyńdap, kúlli álemge Qazaqstan mádenıetiniń asyl jaýharlaryn, kemel qudiretin kórsetpek.
Bul kúnge deıin ult mádenıetiniń sáýletti ordasy baǵyndyrǵan bıikter az emes. Aıtalyq, «Juptyq ekvılıbr» Talǵat Ońalbaev pen Indıra Tutqabekova VI halyqaralyq «Shabyt» shyǵarmashyl jastar festıvaliniń altyn júldegerleri bolsa, «Úıretilgen ıtterdiń» ıesi Tımýr Qorjumbaev Ýchao jáne Ýhan qalasynda ótken halyqaralyq sırk festıvaliniń qola júldegeri atanǵan.
Tolyq eki saǵattyq qoıylym barysynda Qazaqstannyń eńbek sińirgen qaıratkeri Jaıdarbek Kúnǵojınovtyń jetekshiligimen «Nomad» – salt atty-akrobattyq toby, basqa da «Úıretilgen ıtter», «Úıretilgen aıýlar» syndy birneshe top óner kórsetpek. Sondaı-aq ertegilik qoıylymda Maksım Novıkovtyń «Lazerlik shoýy» men «Azııa» bıshi-akrobattyq tobynyń jumysy da astanalyqtarǵa aıryqsha áser syılamaq.
Mıras ASAN,
«Egemen Qazaqstan»
