Foto: Temirbolat TOQMÁMBETOV
Oblys aktıvinde baıandama jasaǵan óńir basshysy Altaı Kólginov Elbasy usynǵan bastamalar aıasynda oblysta atqarylatyn jumystardyń birqataryna toqtaldy.
Birinshi bastama – «Árbir otbasyna baspana alýdyń jańa múmkindikterin berý» Batys Qazaqstan oblysynda da ótkir másele bolyp tur. «Túrli kezdesýlerde, azamattardy qabyldaýlarda jıi qoıylatyn suraq ta osy baspana máselesi» degen Altaı Kólginuly «О́ńirimizde Turǵyn úı qurylys jınaq bankiniń salymshylary 56 myń, al baspana kezeginde turǵandar sany 22 myńnan asty. Prezıdent qabyldaǵan «Nurly jer» baǵdarlamasy óńirimizdegi qurylys salasynyń qarqyn alýyna oń septigin tıgizýde. Sońǵy 2 jyl ishinde 3 myń adam óz úıiniń kiltin aldy. Onyń ishindegi 700 otbasy jetim-jesirler, ardagerler, múmkindigi shekteýli jandar men basqa da áleýmettik toptar ókilderi» dep atap ótti.
Ákimniń aıtýynsha, 2018 jyly Oral qalasynda 2 myńǵa jýyq páterli kópqabatty úılerdiń qurylysy bastalyp, aýdandarda bir jáne eki qabatty 140 úı salynatyn bolady.
Ekinshi bastama boıynsha Batys Qazaqstan oblysynda 73 088 adam (onyń ishinde 67 331 jaldamaly qyzmetker) salyq jeńildigine ıe bolady. Bular – aılyq jalaqysy 60 myń teńgeden tómen qyzmetkerler.
Úshinshi bastama boıynsha aıtar bolsaq, qazirgi tańda óńirdegi eki memlekettik ýnıversıtette 3 135 stýdent grant arqyly bilim alyp júr. Stýdentterdiń áleýmettik jaǵdaıyn zerdelegen saraptama JOO-nyń – 500, kolledjerdiń – 1750 stýdenti jataqhanamen qamtylmaǵanyn kórsetken.
- Biz Prezıdenttiń bastamasyna sáıkes, jataqhana qurylysyna kóbirek kóńil bólip, memleket pen jekemenshik áriptestigi qaǵıdasynda jumystanýymyz qajet. Sondyqtan orta jáne kásiptik oqý oryndardyń stýdentterine arnalǵan 500 oryndyq jataqhana salýdy josparlap otyrmyz, - dedi Altaı Kólginov.
«Shaǵyn nesıe berýdi kóbeıtý»
Batys Qazaqstan oblysynda ishki jalpy ónimdegi orta jáne shaǵyn bıznestiń úlesi 42 paıyzdy quraıdy. Elbasy tapsyrǵan 50%-dyq meje de alys emes. Bıyl óńirde «Bastau bıznes» baǵdarlamasy boıynsha 2 myńnan asa adam arnaıy oqýdan ótedi. Olardyń ınnovasııalyq jobalary 100 AEK-ten aspaıtyn shaǵyn nesıelermen qamtamasyz etiledi.
Elbasy usynǵan bes baǵdarlamanyń ishinde turǵyndardy tabıǵı gazben qamtý isi Batys Qazaqstan oblysynda túbegeıli sheshilgen dese de bolady. 2016 jyly Batys Qazaqstan oblysynyń kógildir otynmen qamtylýy 93,4% bolsa, byltyr bul kórsetkish 94%-ǵa jetti. Iri eldi mekender, aýyldyq okrýg ortalyqtary túgel gazdandyrylyp, kezek shaǵyn eldimekenderge jetti. 2017 jyly alty aýdanda 36 aýylǵa tabıǵı gaz qubyry tartyldy.
Baıandamasyn qazaqtyń uly aqyny Qadyr Myrza Áliniń: «Kólden úlken teńiz bar, Elden úlken neńiz bar?!», «Eń aldymen - el qamy, Sodan keıin qalǵany» degen dana sózderimen qorytqan Altaı Kólginov oblys jurtshylyǵyn aldaǵy kóktem meıramdarymen quttyqtap, el bolashaǵy úshin tynbaı eńbektenýge shaqyrdy.
Qazbek QUTTYMURATULY,
«Egemen Qazaqstan»
