Halyqaralyq áıelder kúni qarsańynda, myńdaǵan adamdardy jaqsylyq jasaýǵa rýhtandyratyn eldegi iri qaıyrymdylyq uıymdary men qozǵalystardyń negizin qalaǵan áıelder qatysyp, pikirlerin bildirdi. Olardyń qatarynda «Qaıyrymdylar klýby» eriktiler qozǵalysynyń negizin qalaýshy Gúlmıra Ábdirasheva, «Álemjan joly» qoǵamdyq qorynyń dırektory Quralaı Isenova, Astana qalasy ákimdiginiń «Mamandandyrylǵan balalar úıi» MKM bas dárigeri Sáýle Kenjebaeva jáne múgedekterdiń «DOS» táýelsiz ómir ortalyǵy» qoǵamdyq birlestiginiń atqarýshy dırektory Qarlyǵash Tynabekova bar.
Jıynda sóz alǵan «Qaıyrymdylar klýby» eriktiler qozǵalysynyń negizin qalaýshy Gúlmıra Ábdirasheva ózderiniń osy ýaqyt aralyǵynda atqarǵan qyzmetterine toqtalyp, túrli sharalarǵa sholý jasady. Al «DOS» táýelsiz ómir ortalyǵy» qoǵamdyq birlestiginiń atqarýshy dırektory Qarlyǵash Tynabekova ortalyqta buryndary jumys jasaǵan múmkindigi shekteýli jandarǵa arnalǵan úıirmeniń jumysy qaıta bastalatynyn baıandady. Oǵan kez kelgen múgedek jannyń qatysýyna múmkindik baryn jáne úırenem dep kelgen jandarǵa úıirmeniń kestesin óz ýaqytyna qaraı yńǵaılap beretinin jetkizdi.
Gúlmıra Ábdirashevanyń aıtýynsha, jaqsylyq jasaý úshin qaltaly bolý mindetti emes, eń bastysy, muqtaj jandardyń muńyna qulaq túrip, olardyń kóńilindegi oıdy kóre biletin kóz ben kómekteskim keledi degen nıet bolsa jetkilikti.
Raýan QAIDAR,
«Egemen Qazaqstan»
