Prezıdent atap ótkendeı, qazirgi kezde elimizdiń joǵary oqý oryndarynda 530 myńnan astam stýdent bilim alyp júr. Olardyń 30 prosentke jýyǵy memlekettik grant boıynsha oqýda. Bul ár on stýdenttiń jeteýi ýnıversıtetter men ınstıtýttarda oqý aqysyn óz qaltalarynan tólep júr degen sóz. Qazirgi zamanda bilim bolashaq mamannyń básekelestikke qabilettiligin anyqtaıdy. Sebebi jaqsy bilim – senimdi irgetas. Ol jas adamnyń óz múmkindigin iske asyryp, ekonomıkalyq jaǵdaıyn jaqsartýǵa jol ashady.
Ekonomıkalyq turǵydan bilimdi, óz-ózine senimdi jastar búginde jáne bolashaqta elimizge qajet. Ol úshin, árıne, maman óz ómiriniń barlyq salasyn jańǵyrtýy tıis. Memleket basshysy Úndeýinde jańa oqý jylynan bastap jyl saıyn bólinetin 54 myń memlekettik grantqa qosymsha 20 myń grant bólýdi tapsyrdy. Onyń 11 myńy tehnıkalyq mamandyqtar boıynsha bakalavrlyq bilim berýge tıesili bolady. Sondaı-aq ol jańa oqý jylynda memlekettik grantqa ıe bolatyn stýdent-jastardyń qataryn 37 prosentke arttyrmaq.
Mine, bul «Tórtinshi ónerkásiptik revolıýsııa jaǵdaıyndaǵy jańa ekonomıkaǵa» suranysqa ıe bolatyn jańa mamandar daıarlaýǵa múmkindik beredi. Tehnologııalyq serpiliste eńbek rynogynda ınjenerler, aqparattyq tehnologııa, robot-tehnıkasy, nanotehnologııa salalarynda maman-kadrlar erekshe suranysqa ıe bolady. Sol sebepten memleket jastarǵa múmkindiginshe qoldaý kórsetip otyr.
Joǵary bilim adamı kapıtaldy qurýdyń jáne damytýdyń faktory ekeni belgili. Osy máselelerdi Prezıdent óziniń Qazaqstan halqyna joldaýlarynda da atap kórsetip keledi. Jasyratyny joq, bizdiń elimizde biliktiligi joǵary mamandar tapshylyǵy problemasy bar. Onyń basty sebebi oqý oryndary túlekteriniń ortasha bilim deńgeıiniń tómendiginde jatyr.
Búginde eńbek naryǵynda aqparattyq tehnologııany meńgergen, daryndy, bolashaǵynan zor úmit kúttiretin mamandarǵa suranys erekshe joǵary. Memleket basshysy, sondaı-aq joǵary oqý oryndary men kolledjderdiń stýdentterin jataqhanamen qamtý máselesi óte ózekti ekenine de nazar aýdardy. Soǵan sáıkes 2022 jyldyń sońyna deıin stýdentterge arnalǵan keminde 75 myń oryndyq jańa jataqhana salynady.
Aleksandr SMIRNOV,
«Sýomı» karel-fın ulttyq-mádenı birlestiginiń tóraǵasy
