«Revolıýsııalar dáýiri áli bitken joq. Tek onyń formasy men mazmuny túbegeıli ózgerdi... Búginde revolıýsııalar óńin ózgertip, ulttyq, dinı, mádenı, separatıstik perde jamyldy. Biraq bári de, túptep kelgende, qantógispen, ekonomıkalyq kúıreýmen aıaqtalatynyn kórip otyrmyz». Elbasynyń dál osy sózin basty nazarǵa alǵan ókil ımam búgingi túr-sıpatyn ózgertken revolıýsııalardyń biri – qoǵamdy úrkitken qandy teraktiler ekendigin atap ketti. Sońǵy on jylda oryn alǵan 10-nan asa teraktini mysalǵa keltirip, olardyń ózge elderdegi búlikterden bir aıyrmashylyǵy – qazaqtyń ulty bir qazaqqa qarý kezenýi ekendigin aıtty. Munyń saldary syrtqy kúshtiń saıası ıdeologııasynyń qurbany bolǵan qandastarymyzdy ultynan jırendirip, óz Otanyna degen óshpendiligin oıatýǵa deıin alyp bara jatqandyǵyn aıtyp, oı saldy.
Taqyryp din turǵysynan talqylanyp qana qoımaı, qazaq eliniń tarıhymen baılanystyrylyp túsindirildi. Patsha ókimetiniń otarlaý saıasaty, asharshylyq, saıası qýǵyn-súrgin sekildi zobalań jyldarynda qaza tapqan qazaqtar, bosqyndar týraly statıstıkalyq málimetter keltirildi.
«Búgingi beıbitshilik zamannyń qadirin jiti baǵalamaıtyndyǵymyz keı isterde asyǵystyq pen albyrttyqqa jol berýimizge ákep soǵady. Mundaı albyrt minez ben ambısııa, ásirese qoǵamdaǵy jastarymyzǵa tán qasıet. Al eń ókinishtisi, olardyń taǵatsyzdyǵy men tájirıbesizdigin syrtqy kúshter tıimdi paıdalanyp ketip jatyr. Jelikpe jastardyń qolymen jasalǵan keshegi teraktiler sonyń dáleli», dedi ókil ımam Tólebı Ospan.
Sonymen qatar ásiredinshildikke aparatyn aǵat oılar, namaz oqymaǵandy kápir deý, dástúrdi shırkke balaý, óz ultyn ulyqtamaý, Otanyn súımeý sekildi búgingi din ustanýdaǵy birqatar qatelikter keńinen túsindirildi. Jamaǵatty jat aǵymnyń zardabynan saqtandyryp, teris aǵymdy nasıhattaý, terakt uıymdastyrý, oǵan qatysý nemese qylmysqa qatysty qandaı da bir aqparatqa ıe bolýdyń ózi zań aldynda jaýapkershilik júkteıtindigi, tipti jańa zań jobasynda azamattyqtan aıyrý máselesi qarastyrylyp jatqandyǵy aıtyldy.
О́kil ımam Elbasynyń árbir Joldaýy memlekettik mekeme qyzmetkerlerine ǵana emes, siz benen biz, jalpy halyqqa joldanatyn Úndeý, bolashaqqa belgilengen baǵyt-baǵdar ekendigin aıtyp, jamaǵattyń Joldaý mátinderimen tanysyp, oǵan ún qosa bilýine basa mán berdi.
Qazaqstanǵa qajetti evolıýsııalyq damý jolyn júzege asyrý úshin adam kapıtalyn qalyptastyrý kerektigin aıtqan ókil ımam qazirgi qoǵamdaǵy buǵan qajetti barlyq jaǵdaı jasalǵandyǵyn tilge tıek etti. Al ony júzege asyrýǵa bastysy adam kapıtaly, tabandylyq pen tózim kerektigi týraly oıyn bylaı dep túıindedi:
«Kez kelgen memlekettiń basty kapıtaly adam jáne ol Ata Zańymyzda anyq jazylǵan. Bul aqıqatty Alla taǵala «Tın» súresindegi: «Biz adam balasyn ardaqtap jarattyq» degen Quran aıatymen de aıqyndap qoıǵan. Aınaladaǵy barlyq múmkindik, jaǵdaı adamzat balasy úshin jasalýda. Oblys ortalyǵynyń ózinde sońǵy jyldary О́ner ortalyǵy, Mádenıet úıi, «Jekpe-jek» saraıy, ártúrli sport keshenderi, kitaphanalar, turǵyn úıler paıdalanýǵa berilip, oblystyq murajaı sekildi jańa ǵımarattar boı kóterýde. О́tken jyly qalada 2 meshit ashyldy. Endi bizge osynaý nyǵmettiń bárin ıgeretin adam kapıtaly, qoǵamnyń qulshynysy men izdenisi qajet. Bizge bilimdi jas, bilikti maman, ónerli óren, salıqaly jamaǵat pen sanaly urpaq qajet», dep sózin aıaqtady ókil ımam Tólebı Ospan.
Dáristi uıyp tyńdaǵan jamaǵat jaqsy áser aldy. Shara sońynda sóz alǵan qoǵam qaıratkeri Amangeldi Aıtaly dindar bolý dúnıeni tárk etý degen sóz emestigin aıtyp, ǵumyry izdeniske toly, qulshylyǵy bútin bolǵan Abaıdyń mysalyn sóz etti. О́kildik tarapynan bastaý alǵan ıgi bastamaǵa oń baǵasyn berip, tushymdy taqyryp kóterilgendigin, onyń jamaǵatqa dáıekti dáleldermen uǵynyqty túrde túsindirilgendigin aıtty. Elbasynyń ulttyq sanany jańǵyrtýda usynǵan ozyq ıdeıalaryn eń áýeli, siz benen biz, halyq júzege asyratyndyǵyn jetkizdi.
Temir QUSAIYN,
«Egemen Qazaqstan»
AQTО́BE
Sýrette: dáristen kórinis
