Dúısenbide bastalǵan saılaý úsh kúnge sozylady. Áıtse de, daýys berýdiń qorytyndysy kelesi dúısenbide jarııalanbaq. Sheteldik buqaralyq aqparat quraldary taratqan málimetterge súıensek, saılaýda kim jeńiske jetetini álden belgili. Máselen, Euronews arnasy M.Mýsany «qýyrshaq qarsylas» dep sanaıdy. Munyń óz sebebi bar. Ol prezıdenttikke tirkelý rásimi aıaqtalar kúni ǵana ótinish bildirgen. Sondaı-aq saılaý naýqany kezinde qazirgi el basshysy as-Sısıdiń kandıdatýrasyn qoldap júrgen-di.
Al Jazeera da jeńimpazdyń kim bolatyny álden belgili dep esepteıdi. Munyń sebebi retinde arna M.Mýsanyń buǵan deıin as-Sısıdi qoldaǵanyn, elektorattardyń daýys berýge bári qatyspaıtynyn keltiredi. Osynyń bárin eskere kele, as-Sısıdiń kezekti márte Mysyr bıleýshisi atanatynyn boljaý qıyn emes.
Jalpy, qazirgi el basshysy Abdel Fattah as-Sısı 2014 jylǵy saılaý kezinde jeńiske jetti. Egıpet zańyna sáıkes, as-Sısı ekinshi márte prezıdenttikke saılanýǵa quqyǵy bar. Abdel Fattahtyń ózi CNBC arnasyna bergen suhbatynda konstıtýsııaǵa saı eki merzim ǵana el basqaratynyn málimdegen.
Daýys berýdiń birinshi kúni aıaqtalǵan soń baspasóz jıynyn ótkizgen premer-mınıstr Sherıf Ismaıyl saılaýdyń sátti ótip jatqanyn málimdegen. Ol mysyrlyqtar sharaǵa belsendi qatysatynyna senim bildirdi. Onyń pikirinshe, saılaýdan keıingi kelesi kezeń el damýyna, ekonomıkalyq reforma jasaýdyń mańyzdy qadamy bolmaq. Al saılaý jónindegi ulttyq komıssııanyń tóraǵasy Mahmýd ásh-Sharıftyń aıtýynsha, saılaý bólimshelerinde daýys beri ashyq, zańǵa saı júrgizilip jatyr.
Aıta ketý kerek, Mysyr halqynyń 60 mıllıonǵa jýyǵy daýys berý quqyǵyna ıe. El boıynsha 13 706 saılaý bólimsheleri ashylǵan. Sondaı-aq 18 myń sýdıa, 54 úkimettik emes jáne qoǵamdyq uıym, 9 halyqaralyq uıym, 110 myńǵa jýyq memlekettik jáne quqyq qorǵaý mekemelerdiń qyzmetkerleri jáne BAQ ókilderi saılaý barysyn baqylaıdy.
Abaı ASANKELDIULY,
«Egemen Qazaqstan»
