Astana qalasynyń ákimi Áset Isekeshevtiń tapsyrmasymen «2018 jyly Astana qalasy aýmaǵynda kóktemgi sý tasqynyn ótkizýge daıyndyq boıynsha keshendi is-sharalar jospary» bekitilgen. Keshendi josparǵa sáıkes sý tasqynyn boldyrmaý jóninde astananyń aýmaǵynda 2018 jyly 27 yqtımal sý basý ýchaskeleri belgilendi. Árbirinde jumys júrgizilip, qajetti materıaldar kólemi, qarjylandyrý, jaýapty oryndaýshylar anyqtalǵan.
«Qazirgi tańda 3 mln tekshe metrden astam qar shyǵaryldy. Kommýnaldyq qyzmetkerler táýlik boıy qardy jınaýmen jáne qala syrtyna shyǵarýmen aınalysýda. Bul jumys mereke kúnderi de jalǵasty. Qala mańyn ushaqpen aralaý barysynda Maıbalyq kóli, Vıacheslavskoe sý qoımasy aýdanyndaryndaǵy, Qaraǵandy jáne Aqmola oblystarynyń eldi mekenderindegi qar men ylǵaldylyq qory naqtylandy», dedi Astana qalasy ákiminiń baspasóz hatshysy Elvıra Júrgenbaeva.
Astana ákimdigi jeke sektor turǵyndarynan úılerine sý kirýdiń aldyn alý maqsatynda aýladaǵy qardy shyǵarýdy surady.
Qazirgi kúni gıdrotehnıkalyq qurylystar kóktemgi sý tasqynyna daıyn, atap aıtqanda Astana sý qoımasynyń jaı-kúıi baqylaýda. Qar qorynyń kólemin bilý maqsatynda monıtorıng júrgizý jáne alynǵan derekterdi taldaý týraly jumys rejıminiń josparly kestesi bekitilgen.
Astana qalasy Tótenshe jaǵdaılar departamenti kóktemgi sý tasqyny jaǵdaıyn baqylaýda ustaýda jáne kúnniń jylynýyna baılanysty táýlik boıy kezekshilik uıymdastyrǵan.
