Brıfıngte Astanadaǵy saýda oıyn-saýyq ortalyqtarynda jáne adamdar kóp shoǵyrlanatyn oryndarda órt qaýipsizdigin saqtaý boıynsha jospardan tys qosymsha tekserýler júretini aıtyldy.
Astanada 60-tan astam densaýlyq saqtaý orny, 300 mektepke deıingi bilim berý ortalyǵy, 100 mektep jáne 10 arnaıy bilim berý mekemesi, 50 JOO men kolledj bar. Sonymen qatar, 117 saýda nysany bar, onyń 83-i saýda úıi, 9-y iri saýda oıyn-saýyq ortalyǵy, 25-i bazar jáne 200-den astam qonaq úı, 60 hostel jáne 600-den astam adamdar tamaqtanatyn qoǵamdyq oryn bar.
«Astana qalasy boıynsha órttiń, tótenshe jaǵdaıdyń aldyn alý árdaıym jaýapty mekemelerdiń baqylaýynda. Jyl saıyn josparly túrde tekserý sharalary júrgizilip otyrady. Onyń ishinde bilim berý, densaýlyq saqtaý salasyna tıesili nysandarda órt qaýipsizdigin saqtaý erekshe baqylaýda», - dedi Elvıra Júrgenbaeva.
Naýryz aıynan bastap Astana qalasynda 70 bilim berý mekemesiniń órt qaýipsizdigi tekserilgen. Osy jyldyń mamyr aıyna deıin barlyq bilim berý mekemeleri tekseriledi. Tekserý komıssııasynyń quramynda TJD-niń, Bilim basqarmasynyń ókilderimen qatar ata-analar da bar.
«Qazirgi kúni qalamyzdaǵy 9 OSO-nyń 6-y tekserildi. Úsh ortalyqtan 32 ereje buzýshylyq anyqtalǵan. Ákimshilik jaýapkershilikke 3 adam tartylyp, aıyppul salyndy. Eki OSO-da aýdıt júrgizildi, al bir nysanǵa(Mega Silk Way Astana) tekserý osy jyly jasalady. Bıyl erekshe tártippen Astanadaǵy 50 saýda nysanyna tekserý júrgiziledi. Tekserý kezinde qaýipsizdik tehnıkalary erejesiniń saqtalýy, órt sóndirý júıesi men habarlandyrý, dabyldy eskertý, evakýasııa shemasy men avarııalyq shyǵý joldaryna basa mán berilmek», - dedi Elvıra Júrgenbaeva.
Tekserý barysynda syrtqa shyǵý joldarynyń jaǵdaıy, jaryq berýshi elektr jelileri men qýat kózderiniń jaı-kúıiniń tıisti deńgeıde bolýy, órt jaıynda dabyl beretin avtomatty júıeniń durystyǵy, ishki jáne syrtqy órtke qarsy sý jabdyǵy men órt sóndirý quraldarynyń saqadaı saı turýyna basa mán beriledi.
